2021 jylǵy Memlekettik bilim granty iegerleriniń tolyq tizimi jariialandy, dep habarlaidy "Ult aqparat".
Bul tizimdi myna jerden kórýge bolady. Sondai-aq, ol BǴM Telegram-kanalynda da jariialandy.
Endigi kezekte memlekettik bilim granty iegerleri oqýǵa qabyldaný úshin 25 tamyzǵa deiin qujattaryn joǵary oqý oryndaryna tapsyrýy tiis.
Sonymen qatar grant iegerleriniń esimi saǵat 16.00-de:
— «Egemen Qazaqstan» respýblikalyq gazeti jáne https://egemen.kz/ saitynda;
— «Kazahstanskaia pravda» respýblikalyq gazeti jáne https://www.kazpravda.kz/ saitynda jariialanady;
Aita keteiik, biyl Prezident tapsyrmasymen granttardyń jalpy sany 5 myńǵa artyp otyr.
Iaǵni, ótken jyly bilim berý granttarynyń sany 51 myń bolsa, biyl 56 myńǵa deiin artty. Sondai-aq granttardy bólý kezinde alǵash ret azamattardyń áleýmettik osal sanattary úshin kvotalar kózdelgen. Osy jyly bilim berý granttaryn taǵaiyndaý konkýrsyna qatysý úshin barlyǵy 75 myńnan astam ótinim berildi. Bul 2020 jylmen salystyrǵanda 13 myńǵa artyq.
Qujat qabyldaý 16-26 shilde aralyǵynda júzege asyryldy.
Úmitkerler arasynda «Altyn belgi» iegeri, halyqaralyq jáne respýblikalyq olimpiadalardyń jeńimpazdary, sondai-aq patriottyq sezimi men belsendi azamattyq ustanymy úshin úzdik belgisimen marapattalǵan balalar bar. Ball teń bolǵan jaǵdaida olar basym quqyqqa ie bolady.
Sondai-aq aýyl jastary arasynan shyqqan azamattar úshin aýyldardyń áleýmettik-ekonomikalyq damýyn aiqyndaityn mamandyqtarǵa jáne QR azamaty emes, ulty qazaq adamdarǵa kvota qarastyrylǵan. Biyl 145 myńnan astam talapker Ulttyq biryńǵai testileýden ótti. UBT qorytyndysy boiynsha shekti baldy 88 myńnan astam adam jinady. Bul – qatysýshylardyń jalpy sanynyń shamamen 60%-y.
UBT qorytyndysy boiynsha keminde 65 ball jinaǵan talapkerler ulttyq joǵary oqý oryndarynda grantqa úmitker bola alatynyn aita keteiik.
«Pedagogikalyq ǵylymdar» baǵyty boiynsha keminde 75 ball, «Densaýlyq saqtaý» − keminde 70 ball, «Aýyl sharýashylyǵy jáne bioresýrstar», «Veterinariia» – keminde 60 ball, basqa joǵary oqý oryndaryna oqýǵa túsý úshin keminde 50 ball qajet.
