Bilim jáne ǵylym ministri Ashat Aimaǵambetov bilim berý mekemeleriniń basshylaryn rotatsiialaý máselesin qozǵady, dep habarlaidy "Ult aqparat".
«Memlekettik bilim berý uiymdarynyń birinshi basshylaryn rotatsiialaý qaǵidalary Qazaqstan Respýblikasy Ádilet ministrliginde tirkeldi.
Osylaisha, bilim berý júiesinde mektep, kolledj jáne balabaqsha direktorlaryn rotatsiialaý institýty paida boldy.
Bilim berý salasynda on myńnan astam memlekettik uiym bar. Kóptegen basshylar, merzimsiz eńbek kelisimsharttaryn jasasqan.
Osyǵan bailanysty bir uiymda 10-15 jyl jáne odan da kóp jumys isteitinder az emes. Árine, olardyń arasynda óz jumysyn jaqsy biletin jáne mektep, kolledj, mektepke deiingi nemese qosymsha bilim berý uiymdarynyń damýyna eleýli úles qosatyn basshylar bar. Degenmen, 10-15 jyl boiy bir orynda otyryp, ózderiniń bastamashyldyǵy men damýǵa degen yntasyn joǵaltatyn mektep direktorlary da bar», deidi ministr.
Vedomstvo basshysy sózin jalǵai otyryp, eger basshy uzaq jyldar boiy bir bilim berý uiymyn basqarsa, bul motivatsiianyń tómendeýine, jumys barysynda jańa tásilderdiń bolmaýyna ákelýi múmkin ekenin aityp ótti.
«Basshylyq etetin uiymnyń aýysýy ózgeristerdi engizýge jáne basshynyń jumystaǵy tiimdiligin arttyrýǵa múmkindik beredi. Endi Erejelerdiń negizgi basymdyqtaryna toqtalyp ótsem.
Birinshiden, bir bilim berý uiymynda 4 nemese 7 jyldan astam jumys istegen basshylar rotatsiialanady.
Bul rette, osy bilim berý uiymynda laýazymǵa taǵaiyndalǵan kúnnen bastap 4 (tórt) jyl jumys atqarǵan birinshi basshy rotatsiiadan ótinishi negizinde bosatylyp, tiisinshe qoldanystaǵy eńbek sharty sheńberinde óz jumysyn jalǵastyra alady.
Alaida, eger basshy atalǵan uiymda 7 jyldan astam ýaqyt jumys istese, onda ol mindetti túrde rotatsiialanady. Osylaisha, bir bilim berý uiymyna jetekshilik etý merzimi 7 jyldan aspaýy tiis», dedi Ashat Aimaǵambetov.
Ekinshiden, rotatsiialaýdyń tómendegidei sharttary bar:
- rotatsiialaýdy oblystardyń jáne respýblikalyq mańyzy bar qalalardyń bilim basqarmalary júzege asyrady;
- rotatsiia bir eldi meken aýmaǵynda júrgiziledi;
- rotatsiialaýdy bir deńgeidegi uiym basshylary arasynda júrgizedi;
- rotatsiialaý kezinde birinshi basshylardyń biliktilik sanaty, iaǵni atalǵan sanat úshin tólenetin qosymsha aqy da merzimi aiaqtalǵanǵa deiin saqtalady.
«Ashyqtyq pen obektivtilikti qamtamasyz etý úshin rotatsiialaý týraly máseleni qaraý úshin komissiia jumys isteitin bolady.
Rotatsiialaý júiesiniń tiimdi jumys isteýi jáne tutastai alǵanda bul qaǵidalardyń jergilikti jerlerde durys iske asyrylýy úshin ministrlik monitoring júrgizetin bolady», dep jazdy ministr Facebook paraqshasynda.
