Bilim jáne ǵylym ministri Ashat Aimaǵambetov Reseidiń Perm ýniversitetindegi atysqa bailanysty pikir bildirdi, dep habarlaidy "Ult aqparat" ministrdiń Facebook-tegi paraqshasyna silteme jasap.
«Perm ýniversitetinde atys saldarynan qaza bolǵandardyń týystary men jaqyndaryna kóńil aitamyn. Zardap shekkenderdiń tezirek saýyǵyp ketýine tilektespin. Qazan qalasyndaǵy terakt kezinde jaqyndary qaza tapqandardyń jan-jaralary áli de jazyla qoiǵan joq. Búgingi oqiǵa jyǵylǵanǵa judyryq bolyp otyr. Bul qaiǵyly oqiǵalar elimizdegi mektepterde, kolledjder men joǵary oqý oryndaryndaǵy qaýipsizdikti kúsheitýdiń qanshalyqty mańyzdy ekenin kórsetedi. Oqý oryndarynyń árbir basshysy balalardy qorǵaý máselesine basymdyq berýi tiis», - dep jazdy ministr.
Sondai-aq ol Prezident Qasym-Jomart Toqaev bilim berý uiymdarynyń qaýipsizdigin qamtamasyz etý qajettiligin atap ótip, bul másele Úkimet otyrysynda egjei-tegjeili qaralyp, ákimdikterge tapsyrma berilgendigin jazdy. Sondai-aq JOO basshylyǵyna oqý korpýstary men jataqhanalarda qaýipsizdikti kúsheitý kerektigi aitylǵan.
Bul tapsyrmalar – jabdyqtardy túgendeý, jedel basqarý ortalyǵyna beinekameralardy qosýdy qamtamasyz etý JOO kirý rejimin kúsheitý jáne tótenshe jaǵdai týyndaǵan kezde qabyldanatyn is-qimyldar boiynsha sabaqtar ótkizý.
«Qazirgi ýaqytta ministrlik basqa memlekettik organdarmen birlesip bilim berý obektileriniń terrorizmge qarsy qorǵalýyn uiymdastyrý boiynsha qujat ázirledi. Osy normativti-quqyqtyq aktini talqylaý barysynda 2000-nan astam suraq pen usynys kelip tústi. Bul qujat keibir azamattardy alańdatatynyn bilemiz. Olar dabyl batyrmalaryn, beinebaqylaý júiesin, týrniketterdi ornatýǵa jáne tótenshe jaǵdaidaǵy oqý-jattyǵýlar ótkizýge qarsy ekendigin jazdy.
Men bul erejelerdiń balalarǵa qaýip tóndirmeitinin, kerisinshe, olardyń qaýipsizdigin qamtamasyz etýge jáne mundai jaǵdailardyń aldyn alýǵa baǵyttalǵandyǵyn málimdeimin.
Árbir bilim berý uiymynda barlyq qaýipsizdik sharasy qabyldanýy qajet. Ákimdikter bul máseleni keshendi sheshý úshin qosymsha qarajat bólýde.
Atap aitqanda, beinebaqylaý kamerasyn, kúzet signalizatsiiasy men jedel basqarý ortalyǵyna beinekameralardy qosý, ótkizý rejimi uiymdastyrý jáne qaýipsizdik júiesiniń basqa da elementter qarastyrylmaq.
Qyzmetkerler men oqýshylar tehnikalyq sharalardan bólek, tótenshe jaǵdai kezindegi is-qimyl alogoritmin bilý qajet.
Sonymen qatar bilim berý uiymdarynda tárbie jumysyn kúsheitý de basty nazarda bolý kerek.
Biz bul máselelerge erekshe kóńil bólemiz», - deidi Ashat Aimaǵambetov.
