Elimizdiń jalpy bilim beretin mektepterine 6 900-den astam pedagog-psiholog qajet. Bul jaiynda Senat depýtattarynyń saýalyna QR Bilim jáne ǵylym vitse-ministri Bibigúl Asylovanyń jaýabynda aitylǵan, dep habarlaidy QazAqparat.
«Jalpy bilim beretin mektepterde 7 652 pedagog-psiholog jumys isteidi. Óńirlerde 1 876 psihologiialyq qyzmet jumys istep tur, onda 11 myńnan astam maman qyzmet atqarady. Bilim berý uiymdary Memlekettik bilim berý uiymdary qyzmetkerleriniń úlgi shtattaryna sáikes pedagog-psihologtyń shtat birlikterimen qamtamasyz etiledi. 2021-2023 jyldar aralyǵynda respýblikalyq biýdjet esebinen «Órleý» biliktilikti arttyrý ulttyq ortalyǵy» AQ bazasynda 97 672 mln teńge somasyna 1 535 pedagog-psihologtyń biliktiligin arttyrý josparlanǵan», - delingen vitse-ministr jaýabynda.
Usynylǵan derekterge sáikes, 2021 jyly – 500, 2022 jyly – 500, 2023 jyly 535 adam atalǵan ortalyqta biliktiligin arttyrady.
2019 jylǵy 1 qyrkúiekten bastap ulttyq testileýden sátti ótken jaǵdaida pedagog-psihologterge pedagogikalyq sheberlik sanaty beriledi jáne qosymsha aqy tólenedi. Sonymen qatar, bilim berý uiymdarynda psihologiialyq qyzmet júiesin odan ári damytý úshin qolda bar derekter boiynsha qosymsha 6 900-den astam pedagog-psiholog qajet. Joǵaryda baiandalǵandy eskere otyryp, Balanyń quqyqtaryn qorǵaýdy kúsheitý, turmystyq zorlyq-zombylyqqa qarsy is-qimyl jáne jasóspirimder arasynda sýitsidtiń kóbeiýi máselelerin sheshý jónindegi 2020-2023 jyldarǵa arnalǵan jol kartasynyń aiasynda memlekettik bilim berý uiymdary qyzmetkerleriniń úlgilik shtattaryna ózgerister engizý kózdelgen. Bul pedagog-psihologter shtatyn ulǵaitýǵa múmkindik beredi», - dedi ol.
Vitse-ministrdiń atap ótýinshe, atalǵan jol kartasy aiasynda pedagog-psihologterdiń qyzmetin ádistemelik súiemeldeý boiynsha is-sharalar kózdelgen.
«Jergilikti deńgeide pedagog-psihologterdiń qyzmetin ádistemelik súiemeldeýdi jáne úilestirýdi qamtamasyz etetin oqý-ádistemelik ortalyqtar jumys isteidi. Pedagog-psihologterdiń qyzmetin ádistemelik súiemeldeý bóliginde Ministrlik sheteldik áriptestermen (UNICEF) jáne úkimettik emes uiymdarmen tyǵyz jumys júrgizýde», - dep atap ótedi B.Asylova.
