Búgin QR Mádeniet jáne sport ministrliginiń uiymdastyrýymen «Meniń Qazaqstanym» halyqaralyq mýzykalyq chellendji bastaldy. Áýendi marafon ataqty kompozitor, án janrynyń áigili maitalmany, qazaq estradasynyń negizin salýshylardyń biri, Qazaqstannyń halyq ártisi, QR Ánurany áýeniniń avtory Shámshi Qaldaiaqovtyń týǵan kúnine arnalady, dep habarlaidy "Ult aqparat"].
Halyqaralyq aýqymdy qamtityn bul sharany úilestirý «Qazaqkontsert» uiymy janyndaǵy «Kontserttik-gastroldik qyzmet ortalyǵyna» júktelgen. Jobanyń ereksheligi – ony «qazaq mýzykasynyń altyn daýysy», án áleminiń ardageri Bibigúl Tólegenovanyń bastaýynda bolyp otyr. Shámshi Qaldaiaqovtyń úzeńgiles-zamandasy Bibigúl Ahmetqyzy sazgerdiń «Qaiyqta» ánin eń alǵash oryndaǵan edi. Talant iesi jastyq shaǵyn eske alyp, atalǵan ándi tyńdarmandaryna taǵy bir márte usyndy.
Bibigúl Tólegenova «Meniń Qazaqstanym» halyqaralyq mýzykalyq chellendjin jalǵastyrý estafetasyn belgili ánshi Álibek Dinishevke, Qazaqstannyń Halyq artisi Roza Rymbaevaǵa, KSRO jáne Qazaqstannyń Eńbek sińirgen sport sheberi, QR eńbek sińirgen qairatkeri Dáýlet Turlyhanovqa, sondai-aq, alys-jaqyn shet elderdegi qandastarymyzǵa joldady. Qazirgi ýaqytta atalmysh estafetany qabyl alýshylar jobany qýatty qoldap, jalǵastyrýǵa belsendilik tanytýda. Máselen, Roza Rymbaeva kezekti án marafonyn qazaq operasynyń qos juldyzy Nurjamal Úsenbaeva men Maira Muhamedqyzyna jáne jas ánshi Ámirege joldaitynyn josparlap otyr. Sonymen qatar, Dáýlet Turlyhanov óziniń sporttaǵy shákirtteri men tanymal óner juldyzdaryn tartpaqshy.
Aldaǵy ýaqytta tanymal óner juldyzdary men talantty akterlerdi, belgili sportshylar men kúlli qazaqstandyqtardy biriktiretin mýzykalyq chellendj óner súier qaýymdy tańǵaldyrary sózsiz.
Aita keteiik, áigili kompozitordyń 90 jyldyǵy respýblikalyq mańyzy bar mereitoilar tizimine engen. Keshe «qazaq valsiniń koroli» atanǵan Shámshi Qaldaiaqovqa týǵan jerinde, Túrkistan oblysynyń Otyrar aýdanynda mýzei ashyldy.
