«SQ-Farmatsiia» JShS-niń basqarma tóraǵasy Berik Shárip Qazaqstanǵa ákelinetin vaktsinalar qalai tekseriletini týraly aitty, – dep habarlaidy QazAqparat.
«Jalpy biryńǵai distribiýtordyń tizimine 20 biologiialyq preparat ense, onyń ishinde toǵyzy – mindetti vaktsina. Ol vaktsinalar ulttyq vaktsinalar kúntizbesi boiynsha egiledi. Biz vaktsinalardy shetelden eki jolmen satyp alamyz. Iaǵni, vaktsinalardyń birinshi pýlyn IýNISEF arqyly, ekinshi pýlyn óndirýshilerdiń tikelei ózinen nemese tender jolymen alamyz. Máselen pnevmokokty bakteriiaǵa qarsy vaktsina «Pfizer» kompaniiasynan tikelei satylyp alynady. Sol sekildi vaktsinalardy álemdik deńgeide shyǵaratyn iri «Sanofi Pasteur», «GlaxoSmithKline» kompaniialarymen de kelisimsharttarymyz bar», - dedi Berik Shárip Densaýlyq saqtaý ministrliginiń Facebook paraqshasynda bergen suhbatynda.
Kompaniia basshysy osy kompaniialardyń báriniń aldyna Qazaqstan Respýblikasy Densaýlyq saqtaý ministrliginiń qoiatyn talaptary baryn málim etti.
«Eń birinshi talap, álbette – sapa. Qazaqstan kelisimshartqa otyrǵan kompaniianyń kez kelgen vaktsinasy Dúniejúzilik densaýlyq saqtaý uiymynyń ekinshi rettik tekserýinen ótýi tiis. Iaǵni, vaktsina DDSU-nyń tekserýinen ótkennen keiin ony álemde paidalaný georafiiasy keńeie túsedi. Sol sebepti biz satyp alǵan 9 vaktsinanyń bári de DDSU-nyń ekinshi rettik tekserisinen ótkenine, sonymen birge qazaqstandyq qana emes, halyqaralyq deńgeidegi qaýipsizdik talaptarynyń bári de sai keletinine sendirgim keledi», - dedi ol.
Áitse de qoǵamda «jeke klinikalardaǵy vaktsina memleket usynatyn vaktsinadan edáýir sapalyraq» degen pikir de bar.
«Sapa jaǵynan vaktsinalardyń bári birdei. Sapasy tómen bolsa kez kelgen vaktsina DDSU-nyń synaǵynan ótpei qalar edi. Odan bólek vaktsina farmatsiialyq qadaǵalaýda da qaralady. Qazaqstanǵa kirgiziletin vaktsina aldymen tirkeý kezeńinen ótedi. Bizde Dári-dármekterdi saraptaý ulttyq ortalyǵy baryn bilesizder. Olar vaktsinany klinikalyq synaqtan ótkizip, tiisinshe oǵan qatysty búkil málimetti tekseredi. Ekinshi jaǵynan olar vaktsinanyń ózi neden turatynyn, shyǵarylǵan kezde qandai konservanttar qoldanylatynyn anyqtaidy. Iaǵni, osy tekseris barysynda belgili bir qaýip anyqtalsa atalmysh vaktsina tirkeýden ótpeidi. Sonymen qatar elge ákelinetin árbir vaktsina partiiasy qaýipsizdik boiynsha sertifikattaýdan ótýi tiis», - dedi Berik Shárip.
