Búgin «Nur Otan» partiiasynyń Ortalyq apparatynda «Umytylǵan qaharmandar» atty jańa kitap kópshilikke tanystyryldy. Bul eńbekke Uly Otan soǵysynda erligimen kózge túsip, joǵary nagradalarǵa usynylǵanymen túrli sebepterge bailanysty tiisti marapatyna qol jetkize almaǵan batyrlar týraly málimetter jinaqtalǵan. Kitaptyń jáne jalpy jobanyń avtory, belgili qoǵam qairatkeri Berik Ábdiǵaliuly.
Jańa eńbek «Nur Otan» partiiasynyń «Ardagerlerdi ardaqtaiyq» partiialyq jobasy aiasynda jaryq kórdi. Saltanatty rásimge partiia Tóraǵasynyń Birinshi orynbasary Máýlen Áshimbaev, belgili memleket jáne qoǵam qairatkerleri, Parlament depýtattary, úkimettik emes uiymdardyń ókilderi jáne kitapqa esimderi engizilgen batyrlardyń urpaqtary qatysty.
«Nur Otan» partiiasy Tóraǵasynyń Birinshi orynbasary jobanyń basty maqsaty umyt qalǵan ardagerlerimizdiń esimderin dáriptep, olardyń erlikterin keńinen nasihattaý ekenin aitty.
– Osy igilikti isimiz arqyly biz jas urpaqty otansúigishtikke tárbieleýdi maqsat tuttyq. Kezinde ózderi kóre almai ketken qurmet pen marapatty búgingi urpaqtaryna kórsetip, atalarymyzdyń erlikterin dáripteýdi kózdedik. Bul – búgingi beibit kúnimizdiń kepili bolǵan ákelerimiz ben atalarymyzdyń aldyndaǵy perzenttik boryshymyz, – dedi Máýlen Áshimbaev.
Sonymen qatar, ol atalǵan eńbekti Berik Ábdiǵaliulynyń «Zabytye Geroi. Geroi Sovetskogo Soiýza» atty jinaǵynyń jalǵasy dep qabyldaýǵa da bolatynyn jetkizdi. B.Ábdiǵaliulynyń buǵan deiin de osy salada zertteýler júrgizip, 2015 jyly joǵaryda atalǵan jinaqty jaryqqa shyǵarǵan bolatyn.
«Umytylǵan qaharmandar» atty jańa eńbekke Keńes Odaǵynyń Batyry ataǵyna usynylǵan 133 maidanger týraly málimetter engizilgen. Olardyń kópshiligi jaiaý ásker. Sondai-aq artillerist, pýlemetshi, saper, tankist, tankige qarsy ózdiginen júretin (SÝ, ISÝ) atqysh, mergen, sanitar, bailanysshy, kavalerist, desantshy, áýe desanty, ushqysh, injenerlik ásker jáne IIHK-niń (NKVD) qyzmetkerleri bar.
Jinaqqa tek marapattaý paraqshasy tiziminen tabylǵan ardagerler ǵana engizilgen. Degenmen, partiia Tóraǵasynyń Birinshi orynbasary elimizde soǵysta eren erlik kórsetse de laiyqty marapatyn ala almaǵan batyrlarymyz tizimdegiden áldeqaida kóp ekenine nazar aýdardy.
– Erlikteri eskerilse de, der kezinde elenbei qalǵan batyrlarymyzdyń budan da kóp ekeni belgili. Sol sebepti «Nur Otan» partiiasy osy baǵytta eńbektenip júrgen azamattarǵa qoldaý kórsetýdi odan ári jalǵastyra beredi. Búgin kópshilikke tanystyrylǵan jańa týyndy bizdiń aýqymdy jumysymyzdyń birinshi kezeńi ǵana. Kelesi kezeńde bastamanyń aiasyn keńeitip, batyrlarymyzdyń esimderin mektepterge, kóshelerge jáne aýyldarǵa berý isin qolǵa alsaq degen josparymyz bar. Aldaǵy ýaqytta sol josparlarymyzdyń da júzege asatynyna senemiz, – dedi Máýlen Áshimbaev.
Sondai-aq ol Ekinshi Dúniejúzilik soǵysyna baǵa bermesten buryn oǵan eń aldymen adamdardyń taǵdyry, qarapaiym halyqtyń erligi turǵysynan qaraý kerektigin aitty.
– Qazirgi tańda Uly Otan soǵysy týraly túrli pikirler aitylyp júr. Biraq biz sol kezde atalarymyz ben ákelerimiz, ájelerimiz ben analarymyz batyrlyq pen batyldyqtyń, qairat pen qajyrlyqtyń, sabyr men tózimniń jarqyn úlgisin kórsetkenin keńinen nasihattaýymyz kerek. Olar bastaryna túsken aýyr jaǵdaiǵa qaramastan adami qasietteri men ómirlik ustanymdarynan ainymai, Otan úshin otqa túsýden tartynǵan joq. Sondyqtan sol bir surapyl jyldar týraly aitqan kezde aldymen osyndai sátterge nazar aýdarǵan jón, – dedi «Nur Otan» partiiasy Tóraǵasynyń Birinshi orynbasary.
Óz kezeginde joba avtory Berik Ábdiǵaliuly soǵys jyldarynda 497 otandasymyz Keńes Odaǵynyń Batyry ataǵyna ie bolǵanyn, alaida usynylǵandardyń sany budan da kóp ekenin aitty.
– Ókinishke qarai, kóptegen jaýyngerge qaharman ataǵy qaitys bolǵan soń berildi. Resei, Belarýs, Ýkraina jáne basqa da Eýropa elderinde milliondaǵan belgisiz jáne aty saqtalmaǵan jas batyrlar máńgilikke qaldy. Soǵys alańdarynda izdestirý jumystary áli kúnge deiin jalǵasýda. Bizdiń ár batyrymyz este saqtaýǵa, qurmet kórsetýge laiyq. Olardyń esimderi eshqashan umytylyp ketpeýi kerek. Sebebi olardyń árqaisysy naǵyz qaharmandar, – dedi Berik Ábdiǵaliuly.
Budan basqa, avtor segiz birdei otandasymyzdyń eki ret Batyr ataǵyna usynylǵanyn tilge tiek etti. Olardyń ekeýi kapitandar Saǵadat Nurmaǵambetov pen Seithan Temirbaev. Eki ret usynylǵanymen olar bir ret bolsyn Batyr ataǵyn aldy. Al qalǵandaryna eki retinde de berilmegen.
– Olardyń arasynda saperler – qatardaǵy jaýynger Qudaibergen Janserikov jáne aǵa serjant Minaiqul Saǵyndyqov, atqyshtar rotasynyń komandiri, leitenant Qabysh Kóktaev, 248 jaýdyń kózin joiǵan mergen, aǵa serjant Zeitin Baijanov jáne maior V.Gýtov pen leitenant V.Gýtovskii bar, – degen Berik Ábdiǵaliuly aldaǵy ýaqytta bul baǵytta jumystar ári qarai jalǵasatynyn jetkizdi.
Al Halyq Qaharmany Muhtar Altynbaev Uly Otan soǵysyna qatysqan jáne sol kezde tylda eńbek etken kez kelgen adamǵa qurmet kórsetý barshamyzdyń basty mindetimiz bolýy kerektigin aitty.
– Juldyzyn alsa da, almasa da, biz úshin soǵysqa qatysqan aǵa býynnyń bári batyr. Bul – bizdiń elimizdiń tarihy. Qandai pikir aitylsa da tarihty eshkim joqqa shyǵara almaidy. Sondyqtan biz Jeńisti jaqyndatqan, soǵan úlken úles qosqan batyrlarymyzdy osylai dáriptep, tek óz elimizdiń kóleminde emes, odan tys aýditoriialarǵa da keńinen nasihattaýymyz kerek, – dedi Muhtar Altynbaev.
Odan bólek, basqosýda Májilis depýtaty Baqytbek Smaǵul, «Qaharman» qorynyń direktory Sabyr Qasymov jáne kitapqa esimi engizilgen batyr Minaiqul Saǵyndyqovtyń uly Marat Saǵyndyqov sóz alyp, atqarylǵan jumystyń mańyzy men máni týraly pikirlerin bildirdi. Is-sharany belgili jýrnalist, kórnekti qalamger Nurtóre Júsip júrgizip otyrdy.
Kitapqa engizilgen Qaharman ataǵyna usynylǵan 133 maidangerdiń kópshiligi jaiaý ásker edi, sondai-aq 26 artillerist, 14 pýlemetshi, 8 saper, 5 tankist, 4 tankige qarsy ózdiginen júretin (SÝ, ISÝ) atqysh, 5 snaiper, 4 sanitar, 3 bailanysshy, 2 kavalerist, 3 desantshy, 1 áýe desanty, 1 ushqysh, 1 injenerlik ásker jáne IIHK-niń (NKVD) 1 qyzmetkeri boldy. Ulty boiynsha – 118 qazaq, 6 Orys, 3 ózbek, 3 tatar, 2 uiǵyr, 1 tájik. Olardyń esimderimen kósheler, mektepter atalsyn. Olar týraly filmder túsirilsin. Olar – bizdiń maqtanyshymyz! Bul olarǵa qajeti joq, biraq bul bizge jáne bizdiń urpaqtarymyzǵa qajet.
Erlik tanytqan qaharmandardyń umytylyp ketken esimderin halyqqa qaitarý úshin áli de jumystaný kerek. Ózderiniń tikelei qyzmettesteri, olardyń komandirleri erlikterine bastaryn iip, olarǵa eń joǵary Batyr ataǵyn usyndy! Olardyń erligi máńgilik ekenin jáne maqtanysh etý úshin biz bilýimiz qajet. Erlik eshqashan umytylmaidy jáne umyt ta qalmaidy.
