QR Premer-Ministriniń orynbasary Gúlshara Ábdiqalyqova men Eńbek jáne áleýmettik qorǵaý ministri Berdibek Saparbaev Qostanaidaǵy kópbalaly jáne az qamtylǵan otbasylardyń úilerine bardy, dep habarlaidy QazAqparat tilshisi.
Úkimet músheleri Qostanai aýdanynyń Zatobol jáne Michýrin aýyldarynda turatyn kópbalaly otbasylarǵa bardy. Sonyń biri - mektep jasyndaǵy 6 balasy bar Mihailovtar otbasy. Olar Zatobol aýylyndaǵy jer úilerdiń birinde turady. Otaǵasynyń aitýynsha, olar ai saiyn ákimdikten materialdyq kómek alady. Jergilikti bilik byltyr bul otbasyǵa qysqy otyn alý úshin de qarajat bólgen. Endi Gúlshara Ábdiqalyqova úidiń shatyryn jóndeý jáne terezelerin aýystyrýda kómek kórsetilýi kerek ekenin aityp, ákimdikke tapsyrma berdi.
Vitse-premer Michýrin aýylynda turatyn Kimder otbasyna da at basyn burdy. Olar bes qyzdy tárbielep otyr. Qyzdardyń barlyǵy sabaqty jaqsy oqidy. Bul otbasy úidi keńeitý úshin ákimdikke ótinish jazǵan.
«Oblystaǵy korei etno-mádeni birlestigi Kimder otbasyn qamqorlyqqa aldy. Qujattary daiyn. Endi 4 qosymsha bólme salyp beremiz. Qazir úidiń kólemi 28 sharshy metr bolsa, endi ol 70 sharshy metrge deiin ulǵaiady. Aldaǵy úsh ai jazda qurylys jumystaryn tolyǵymen aiaqtaimyz», - dedi «BK-Stroi» qurylys kompaniiasynyń direktory Valerii Poleshko.
Al Gúlshara Ábdiqalyqova balalardyń ósip kele jatqanyn aityp, úi iesine jeke kásip ashýǵa keńes berdi.
«Bes balańyz da ósip qalypty. Olardyń jaǵdailarynyń jaqsy bolýy sizge tikelei bailanysty. Sol sebepti, óz kásibińizdi ashyńyz. Qazir tegin oqý kýrstary bar. Sizge jergilikti bilik kómektesedi», - dedi QR Premer-Ministriniń orynbasary.
Budan keiin Úkimet ókilderi Rýdnyi qalasyndaǵy kópbalaly Myrzataevtar otbasyna bardy. Bul januiada alty bala ósip keledi. Otaǵasy Ábish Myrzataev qoǵamdyq kólik júrgizýshisi bolyp jumys isteidi. Al jary Indira Nazarova ázirge úi sharýasynda. Otbasy birneshe jyl buryn Túrkistan oblysynan Nur-Sultan qalasyna kóship kelgen. Alaida, otaǵasy jumys babymen kenshiler qalasyna qonys aýdardy. Munda olar ataýly kómekke ie bolyp otyr. Baspana kezegine de turdy.
«Sizderge ońtústiktegi Jetisaidyń ystyǵynan soń soltústiktiń sýyǵana úirený ońai emes. Klimat adamǵa áser etedi. Endi bul jerde ulttyq qundylyqty saqtaýda, memlekettik tildiń qanat jaiýyna úlesterińizdi qosyńyzdar. Ońtústiktiń eńbekkerligi men mádenietin kórsetý kerek. Qajet bolsa, Jetisaidaǵy jurtty Rýdnyiǵa shaqyryńyzdar!» - dep keńes berdi Berdibek Saparbaev.
Qostanai oblysy ákiminiń orynbasary Marat Júndibaevtyń málimetinshe, óńirde «Baqytty otbasy» jobasy sátti iske asyrylýda. Osy ýaqytqa deiin 2 myńnan astam otbasyǵa materialdyq kómek kórsetildi. Sonymen qatar demeýshiler kópbalaly 14 otbasyǵa páter satyp alyp bergen.
Eske salsaq, Gúlshara Ábdiqalyqova keshe de kópbalaly otbasylarmen kezdesti. Sonyń biri - Shákirovtar otbasyna metsenat Igor Kim úsh bólmeli páter alyp bergenin habarlaǵan bolatynbyz.
Búgin Úkimet músheleri Rýdnyi jumysshylarymen kezdesti.
