Pedagogika jáne psihologiia ǵylymdarynyń doktory, professor, Qazaqstannyń eńbek sińirgen ǵylym jáne tehnika qairatkeri Qubyǵul Bozaiuly Jaryqbaev dúnie saldy. Bul týraly Facebook paraqshasynda ál-Farabi atyndaǵy QazUÝ filosofiia kafedrasy jazdy.
«Ál-Farabi atyndaǵy Qazaq ulttyq ýniversiteti filosofiia jáne saiasattaný fakýlteti, filosofiia kafedrasynyń ujymy pedagogika jáne psihologiia ǵylymynyń doktory, professor, QR Eńbek sińirgen ǵylym jáne tehnika qairatkeri, otandyq psihologiia ǵylymynyń qulabyzy, filosoftardyń da jańa býynyn qalyptastyryp, Farabitanýǵa zor úles qosqan ǵalym Qubyǵul Bozaiuly Jaryqbaevtyń ómirden ótýine bailanysty ul-qyzdaryna, týǵan-týys baýyrlaryna, jaqyndaryna qaiǵysyna ortaqtasyp, kóńil aitady. Marqumnyń jany jánnatta, imany salamat bolsyn!» dep jazylǵan mátinde.
Qubyǵul Bozaiuly 1929 jyly Aqtóbe oblysy Alǵa aýdany Kókbulaq aýylynda dúniege kelgen.
1946 jyly Aqtóbe muǵalimder institýtyn jáne 1951 jyly QazMÝ-di bitirgen.
1951-1958 jyldar aralyǵynda Qyzylorda pedagogikalyq institýtynda assistent, 1958-1977 jyldar aralyǵynda Shymkent pedagogikalyq institýtynda aǵa oqytýshy, dotsent, kafedra meńgerýshisi, 1977-1987 jyldary QazMÝ-de dotsent, kafedra meńgerýshisi boldy.
1987 jyldan QazUÝ-de professor, 1998 jyldan etnopedagogika jáne etnopsihologiia ortalyǵynyń direktory qyzmetterin atqardy.
Ǵylymi-zertteý jumystarynyń negizgi baǵyty: Qazaqstandagy psihologiialyq jáne pedagogikalyq oi-pikirlerdiń damý tarihy, etnopsihologiia máseleleri.
Ol Alash qairatkerleriniń psihologiialyq jáne pedagogikalyq muralary jóninde birqatar ǵylymi eńbekter jazǵan.
