Ulybritaniiada burynǵy parlament depýtaty Enn Ýiddikombtyń ólimine qatysty tergeýde jańa derekter jariia boldy. Tergeýshilerdiń málimetinshe, kisi óltirdi degen kúdikke ilingen azamat oqiǵa bolatyn kúni eldiń basqa óńirinen Devon graftyǵyna deiin shamamen 430 shaqyrym jol júrgen, dep habarlaidy ult.kz.
The Telegraph basylymynyń jazýynsha, baqylaý kameralaryna túsken beinelerde kúdiktiniń Ońtústik Iorkshirdegi úiinen tańerteń shyǵyp bara jatqany kórinedi. Kýágerler onyń kólikke aǵash taiaqqa uqsas zatty salyp jatqanyn baiqaǵan. Keiin ol qyzyl tústi avtokólikpen Dartmýr ulttyq parki mańyna qarai jolǵa shyqqan degen boljam bar.
78 jastaǵy Enn Ýiddikomb Devondaǵy jeke úiinde óli kúiinde tabylǵan. Politsiia onyń basynan aýyr jaraqat alǵanyn habarlady. Aldyn ala boljam boiynsha, shabýyl 9 shilde kúni túske qarai jasalǵan. Marqumnyń denesin kelesi kúni úi qyzmetkeri taýyp, jedel járdem shaqyrǵan.
Kúdikti retinde 28 jastaǵy er adam ustaldy. Politsiia qazirgi ýaqytta bul iske basqa adamdardyń qatysy bar degen nusqany qarastyrmai otyr. Tergeý jalǵasyp jatqandyqtan, qylmystyń naqty sebebi ázirge jariialanǵan joq.
Alǵashqy málimdemelerde quqyq qorǵaý organdary oqiǵanyń saiasi nemese terroristik astary joq ekenin aitqan bolatyn. Alaida keiinirek anyqtalǵan jańa aiǵaqtarǵa bailanysty isti Ulybritaniianyń terrorizmge qarsy qyzmeti óz baqylaýyna aldy. Soǵan qaramastan, tergeýshiler qylmystyń túpki motivine qatysty naqty qorytyndy shyǵarǵan joq.
Enn Ýiddikomb 1987–2010 jyldary Ulybritaniia parlamentiniń depýtaty boldy. Keiin Brexit partiiasy men Reform UK saiasi qozǵalysynyń belsendi múshesi retinde tanylyp, televiziialyq jobalarǵa da qatysqan. Onyń qazasy britan qoǵamy men saiasi ortasynda úlken rezonans týdyrdy.
