Aqparatqa qol jetkizý másleleri jónindegi komissiianyń otyrysynda keibir memlekettik organdardyń qoǵam múddesin qozǵaityn aqparatty qyzǵyshtai qorityny aityldy, dep habarlaidy QazAqparat.
Memleket basshysyna engiziletin eldegi aqparattyń qoljetimdiligi týraly esep jobasyn tanystyrǵan Bekzat Rahimov saladaǵy táýekelderdi atady.
Memleket pen qoǵam kommýnikatsiialaryn damytý departamentiniń direktorynyń sózine qaraǵanda, 2015 jyly qabyldanǵan salalyq zańǵa syn aitýshylar bar kórinedi.
«Aqparatqa qol jetkizý máselesiniń qaterlerine mynalar jatady. Azamattardyń jeke jáne derbes derekterin qorǵaý talaptary men aqparatqa qol jetkizý talaptarynyń qaishylyǵy bar. Qoǵam men halyqaralyq uiymdar tarapynan zańnamanyń halyqaralyq standarttarǵa tolyq sáikes kelmeitini týraly syn kóp aitylady. Ásirese ashyqtyq pen táýelsiz baqylaýshy organnyń bolmaýy synǵa ushyraidy. Aqparatqa jol jetkizý týraly zańdy kózge ilmeý jáne zań talaptaryn saqtamaý, sondai-aq zańdy saqtaý jónindegi quzyrly komissiianyń usynymdaryn oryndaý kezinde jasandylyqqa jol berý beleń alǵan. Memlekettik organdar qoǵamnyń múddesin qozǵaityn málimetterdi qyzmettik paidalanýǵa arnalǵan degen jeleýmen shekteýli aqparat sanatyna jatqyzýdy ádetke ainaldyrǵan», - dedi Bekzat Rahimov.
