Qaraǵandy oblysynda, onyń ishinde Jezqazǵan óńirinde sailaý naýqany qarqyndy júrýde. Jalpy, óńirde aýyl ákimderin sailaý 13 aýylda, 17 kentte jáne 45 aýyldyq okrýgte 14 sailaý ýaskesinde ótýde, dep habarlaidy QazAqparat.
Jezqazǵan qalasy Talap aýyldyq okrýginde ákim sailaýy tańǵy 07.00-de bastalyp ketti. №240 sailaý ýchaskesinde karantin talaptary qatań saqtalǵan. Komisiia músheleri arnaiy qorǵanysh kiim kiip, betperde taǵynǵan. Aýyl turǵyndary ara-qashyqtyqty saqtai otyryp, daýys berýde.
«Búgin - elimiz úshin tarihi kún. Qazaqstan Respýblikasynyń Prezidenti Qasym-Jomart Kemeluly Toqaevtyń bastamasymen tuńǵysh ret aýyl ákimderin halyqtyń tikelei sailaýy ótýde. Bul saiasi naýqan - dúiim jurt úshin asa mańyzdy qadam», - deidi Jezqazǵan qalasyndaǵy Qaraǵandy oblystyq Qazaqstan halqy Assambleiasy Qoǵamdyq kelisim keńesiniń tóraǵasy Bekzat Altynbekov.
Halyqtyń sailaýǵa qatysýǵa degen belsendiligi joǵary. Sońǵy málimetterge sáikes, Talap aýyldyq okrýginde 102 sailaýshy daýys berdi, bul ýchaskedegi sailaýshylar sanynyń 20,31%-yn quraidy.
«Aýyl ákimderin sailaý – elimizde demokratiialyq qoǵam qurýǵa jasalǵan mańyzdy qadam. El Prezidenti 2020 jylǵy 1 qyrkúiektegi halyqqa Joldaýynda aýyl ákimderin tikelei sailaýdy engizý qajettigi týraly aitqan bolatyn. Qasym-Jomart Toqaev 2021 jylǵy 25 mamyrda «Qazaqstandaǵy sailaý týraly« Konstitýtsiialyq zańǵa túzetýlerge qol qoidy. Memleket basshysy ózi aitqandai, bul rasynda qoǵamymyzdyń demokratiialyq damý jolyna nyq qadam basqanynyń aiqyn kórinisi. Búgingi sailaýdyń qortyndysy boiynsha úlken ózgerister jáne áleýmettik máseleler óziniń sheshimin tabady dep esepteimin. Osy saiasi doda Qazaqstan halqyn biriktirip, el úmitin aqtaitynyna kámil senemiz. Sondyqtan, biz osy sailaýdan úlken úmit kútemiz», - dep qosty Bekzat Altynbekov.
