Qoǵam qairatkeri Bekbolat Tileýhan Erlan Qarinniń joǵary memlekettik qyzmetke taǵaiyndalýyna bailanysty pikirin bildirdi. Ol áleýmettik jelidegi jazbasynda Qarinniń kásibi biliktiligi men azamattyq ustanymyna joǵary baǵa berdi, dep habarlaidy ult.kz.
Bekbolat Tileýhannyń aitýynsha, Erlan Qaringe kórsetilgen senim – onyń buǵan deiin atqarǵan eńbegine berilgen baǵamen qatar, úlken jaýapkershilik.
Qoǵam qairatkeri Qarinniń memlekettik ideologiia baǵytyndaǵy jumysyna erekshe toqtaldy. Onyń sózinshe, Erlan Qarin memlekettik saiasattyń negizgi mazmunyn qalyptastyryp qana qoimai, ony júielep, qoǵamǵa túsinikti túrde jetkizýdiń tiimdi tetigin qalyptastyrǵan.
«Erlan Qarin ideologiialyq maǵynalardy qalyptastyrýshy, úilestirýshi jáne qoǵamǵa jetkizýshi retinde bul laýazymda sirek kezdesetin júie qalyptastyra aldy», – dep jazdy ol.
Sonymen qatar Bekbolat Tileýhan Erlan Qarinniń tarihqa, dástúrli mádenietke, jyraýlyq ónerge jáne ulttyq sportqa degen qyzyǵýshylyǵyn atap ótti. Ásirese onyń dástúrli sadaq atýǵa kóńil bóletinin tilge tiek etti.
Jazbasynyń sońynda qoǵam qairatkeri Qaringe jańa qyzmetinde sabyr, densaýlyq pen abyroi tiledi.
«Mamandyǵyń tarihshy ǵoi, Ereke! Uly da ádil tóreshi – tarihtyń úddesinen shyǵýǵa is qylǵaisyń. Jaratqan jar bolǵai!» – dep jazdy Bekbolat Tileýhan.
