Baizaq aýdanynda oryn alǵan órt pen jarylystan zardap shekkken 71 úidiń 43-i qalypqa keltirilip úlgerildi, - dep habarlaidy QazAqparat.
Jambyl oblysy Baizaq aýdanynda oryn alǵan oqiǵadan barlyǵy 118 jeke menshik jyljymaityn múlik obektisi, onyń ishinde 106 turǵyn úi jáne 12 kommertsiialyq obekt zardap shekti. Onyń ishinde 35 úi men 12 kommertsiialyq nysan aitarlyqtai qiraǵan. Búgingi tańda 12 merdigerlik uiym qalpyna keltirý jumystaryn qyzý júrgizýde.
Bul týraly óńirlik kommýnikatsiialar qyzmeti alańynda ótken brifingte Jambyl oblysy ákimdiginiń qurylys basqarmasynyń basshysy Erlan Orynbaev aitty.
Sondai-aq, brifingke Baizaq aýdany ákiminiń orynbasary Qairat Ismail, «KazNIISA» AQ júieli taldaý, tótenshe jaǵdai, seismikalyq baqylaý zerthanasynyń basshysy Serik Aldahov ta qatysyp, jýrnalisterdiń suraqtaryna jaýap berdi.
«Baizaq aýdany ákiminiń 28 tamyzdaǵy №114 ókimimen TJ-dan keltirilgen zalaldy anyqtaý úshin komissiia quryldy. Baizaq aýdanynda TJ kezinde zardap shekken obektilerdi tekserý jáne qalpyna keltirý úshin jergilikti atqarýshy organdar 5 jumys tobyn qurdy. Olardyń quramyna qurylys basqarmasynyń, QazQSǴZI, jobalaý uiymdarynyń qyzmetkerleri jáne tótenshe jaǵdai qyzmetkerleri tartyldy. Jumys toptary tekserý júrgizdi jáne aqaýly vedomostar qurastyrdy. Nátijesinde, 8 nysanǵa qorytyndy berildi»,- dedi aýdan ákiminiń orynbasary Qairat Ismail.
Al, oblystyq qurylys basqarmasynyń basshysy Erlan Orynbaevtyń aitýynsha, jeńil zaqymdanǵan 71 úidiń búginde 43-i qalypqa keltirildi.
«Zardap shekken 4 áleýmettik nysan boiynsha aýdan basshylyǵy jeke dara toqtalyp ótti. Onyń ishinde aldyn ala derekter boiynsha apatty jaǵdaida turǵan Jibek joly aýylynyń №5 orta mektebi aitarlyqtai zardap shekti. Jer ýchaskesi anyqtalyp, 150 oqý ornyna arnalǵan jańa mektep qurylysyna jobalyq smetalyq qujattaryn ázirleý bastalypty. 3 uiym (Úshbulaq jáne Bazarbai NSh, Úshbulaq MP) azdap zardap shekken. Onda qalpyna keltirý jumystary demeýshilik qarajat esebinen júrgizilip jatyr. Búginde 12 merdigerlik uiym, 23 tehnikalyq quraldar men 185 jumysshy qalpyna keltirýge kirisip ketti. Birshama jumystary bel ortasyna kelip qalǵan. Al qurylys jumystary eki ai kóleminde aiaqtalady dep josparlanyp otyr», — dedi Erlan Orynbaev.
