Baiqońyr qalasynyń basshysy Konstantin Býsygin jergilikti basylymǵa bergen suqbatynda Resei Federatsiiasy jalǵa alǵan Baiqońyr qalasy men ǵarysh ailaǵy jýyrda Qazaqstanǵa qaitarylady degen qaýesetti joqqa shyǵardy, dep jazady Sputnik agenttigi.
"Ókinishke orai, áleýmettik jelide shyndyqqa janaspaityn, keide tipti qasaqana jalǵan aqparat jii taraidy", - dep atap ótti Býsygin.
Resei men Qazaqstan prezidentteri qol qoiǵan "Baiqońyr" keshenin jalǵa alý týraly kelisimshart merzimi 2050 jylǵa deiin, ony eshkim buzǵan joq, dep atap ótti ol.
Resei Baiqońyr ǵarysh ailaǵy men qalany damytýǵa múddeli ekenin 26 tamyz kúni Máskeýde ótken Qazaqstan-Resei úkimetaralyq komissiiasynyń altynshy otyrysy kezinde rastady, dep málimet berdi qala basshysy.
"Osy otyrysta Baiqońyrda Qazaqstan tarapy salǵan jáne qalanyń turǵyn úi qoryna qosylatyn bes úidi Reseige jalǵa berý máselesi qaraldy. Sol sebepti Baiqońyr mártebesiniń jýyrda ózgeretini týraly qaýesetke esh negiz joq", - dep sendirdi Býsygin.
Onyń aitýynsha, Baiqońyr aldaǵy ýaqytta Qazaqstan tarapymen kelisilgen arnaiy baǵdarlama boiynsha damidy.
Bul baǵdarlamanyń jobasy sonaý 2017 jyly ázirlenipti.
"Sońǵy eki jylda ekonomikanyń aitarlyqtai ózgerýine bailanysty Qazaqstan tarapy bul jobaǵa ózgerister engizip jatyr", - deidi Býsygin.
Qazir baǵdarlamany Qazaqstan Respýblikasynyń memlekettik organdary qarap jatyr, bekitilgen soń Resei tarabyna joldanady, dep atap ótti ol.
Býsyginniń aitýynsha, qala ákimshiliginiń josparynda turǵyndardyń ómir sapasy men deńgeiin kóterýge, sondai-aq Baiqońyrdyń turaqty áleýmettik-ekonomikalyq damýyn qamtamasyz etýge baǵyttalǵan uzaq merzimdi jobalar bar.
