«Nur Otan» partiiasy Tóraǵasynyń Birinshi orynbasary Baýyrjan Baibek jańa oqý jyly qarsańynda Bilim jáne ǵylym ministri Ashat Aimaǵambetovpen birge «Bolashaq» korporativtik qory elimizde alǵash ret inkliýziiany qoldaý kabinetin ashqan elordadaǵy «Qyz Jibek» balabaqshasynda boldy.
«Bolashaq» qory Qamqorshylyq Keńesiniń qurmetti múshesiniń aitýynsha, búginde Qazaqstanda 160 myńnan astam erekshe bilim alýǵa qajettilikteri bar bala bar, onyń ishinde 35 myń bala aýtizmmen aýyrady. Sondyqtan biyl qurylǵanyna 10 jyl tolyp otyrǵan qor jumysynyń negizgi baǵyttarynyń biri «Ár bala mektepke barýǵa laiyqty» inkliýzivtik bilim berýdi damytý jobasy bolyp tabylady.
«Osy jyldar ishinde bolashaqtyqtardyń yqylaspen atqarǵan izgi isiniń arqasynda óńirlerde 59 mamandandyrylǵan ońaltý mekemesi ashylyp, jabdyqtaldy. Onyń ishinde 22 qalada 43 inkliýziiany qoldaý kabineti ashyldy. Erekshe bilim alýǵa qajettiligi bar 2 myńnan astam bala qamtyldy, onyń ishinde 600 bala úide bilim alýdan shyǵaryldy. Inkliýzivtik bilim berý salasynda 420 jańa biliktiligi joǵary jumys orny ashyldy. 2 myń maman men ata-ana arnaiy dáris aldy. Memleket deńgeiinde júieli túrde sheshý úshin qor zańnama aktilerine 70-ten astam usynym men túzetýler engizdi», – dedi Baýyrjan Baibek.
Sonymen birge ol «Bolashaq» qorynyń sarapshylary Nursultan Nazarbaev Qoryna turaqty túrde konsýltativtik qoldaý kórsetetetinin atap ótti. Ótken jyly qordyń 8 óńirde 16 inkliýziiany qoldaý kabinetin ashýy, sondai-aq kelesi jyldyń sońyna deiin aýtizmmen aýyratyn jáne basqa da mentaldy aýytqýlary bar balalar úshin sońǵy úlgidegi úzdik tehnologiialardy endire otyryp, taǵy da 8 zamanaýi eńseli ortalyq salýdy josparlaýy mańyzdy qadam boldy.
«Erekshe qajettilikteri bar balalarǵa qoldaý kórsetý partiia Lideri Nursultan Nazarbaevtyń budan 7 jyl buryn bastamashy bolǵan «Kedergisiz keleshek» jobasy men Memleket basshysy Qasym-Jomart Toqaev jariia etken «Ózgerister joly: Ár azamatqa laiyqty ómir!» sailaýaldy baǵdarlamasy basymdyqtarynyń biri bolyp tabylady. «Barsha balaǵa – teń múmkindikter» qaǵidatyn iske asyra otyryp, 2025 jylǵa deiin kolledjder men joǵary oqý oryndarynda, sondai-aq mektepter men mektepke deiingi uiymdardyń 70%-nde inkliýzivtik bilim berýdi endirý jóninde mindet qoiyldy», – dep atap ótti partiia Tóraǵasynyń Birinshi orynbasary.
Budan bólek, partiia ońaltý ortalyqtarynyń sanyn ulǵaitýǵa jáne erekshe qajettilikteri bar balalarǵa psihologiialyq-pedagogikalyq jáne korrektsiialyq qoldaý boiynsha memlekettik tapsyrysty endirýge qol jetkizbek. Asyraýshysynan airylǵan balalar bir mezgilde múgedektigi boiynsha jáne asyraýshysynan aiyrylýy boiynsha 2 járdemaqy alatyn bolady. Sonymen birge erekshe qajettilikteri bar balalar úshin kámelettik jasqa tolǵannan keiin turǵyn úige kezeginiń úzilmeýi de qamtamasyz etiledi.
Jalpy, sailaýaldy mindettemeler aiasynda taiaýdaǵy 5 jylda erekshe qajettilikteri bar adamdar úshin taǵy da 22 myń áleýmettik infraqurylym nysanyn beiimdeý jalǵastyrylady. Jumysqa ornalastyrý boiynsha kvotany oryndamaǵan jumys berýshiler úshin ótemaqy tólemderi engizilip, ol erekshe qajettilikteri bar adamdarǵa jumys oryndaryn ashýǵa baǵyttalady.
«Nur Otan» maqsaty aiqyn, naqty ister partiiasy retinde óz sailaýaldy ýádeleriniń barlyǵyn iske asyrýdy qamtamasyz etedi. Bul úshin partiia Lideriniń tapsyrmasy boiynsha búginde buǵan qajetti búkil partiialyq infraqurylym jańasha jolǵa qoiyldy: jaýapty depýtattar men basshylar naqty bekitile otyryp, 217 jol kartasy iske asyrylyp jatyr, 12 myńnan astam belsendi azamattyń qatysýymen 1,7 myńnan astam qoǵamdyq keńesterdiń óńirlik júiesi quryldy jáne t.b. Taiaý ýaqytta sailaýaldy baǵdarlama men azamattar amanattarynyń oryndalý sapasyn tekserý úshin jergilikti jerlerde tiisti kóshpeli kezdesýler ótkiziledi», – dep túiindedi Baýyrjan Baibek.
