Almaty ákimi Baýyrjan Baibek joldar men trotýarlardy aldaǵy jóndeý jumystaryna qatysty kóshpeli keńes ótkizdi, dep habarlaidy QazAqparat tilshisi.
Qala basshysynyń aitýynsha, kóktem kelisimen ortalyq dańǵyldarda jáne aýdandyq mańyzdaǵy kóshelerde shuńqyrlardyń, ashyq qudyqtardyń kóptigi jaily shaǵymdar túse bastaǵan.
«Turǵyndar jaqsy jolmen kúzde emes, jazda júrýi kerek. Sondyqtan, ortasha jóndeý júrgizgen kezde ár ýchaskeni merzimderge bólý kerek. Aǵymdaǵy jóndeý boiynsha uzaqmerzimdi kelisimsharttar jasaldy. Iaǵni, kompaniialar zamanaýi tehnika satyp alýǵa aqsha salýy kerek. Merdigerler merziminen keshiktirse, aiyppul salynýy tiis. Aýdan ákimderi ózderi jeke ár ýchaskege baryp, zańsyz qurylys nysandaryn súrýge barynsha atsalysýy qajet», - dedi Baýyrjan Baibek.
Qalalyq Mobildilik basqarmasynyń basshysy Saǵyndyq Telibaevtyń sózine sensek, aýa raiy qolaily bolǵan jaǵdaida magistraldy kóshelerdi aǵymdaǵy jóndeý nebári 10-aq kúnge sozylady.
Biyl uzyndyǵy 111 shaqyrym bolatyn 120 kóshe jóndeledi. Budan bólek, 10 shaǵyn aýdanda 100 shaqyrym kóshe salynady.
Ishine túsip ketken liýkterdiń máselesi boiynsha qazir merdiger uiymdar qosymsha tehnika satyp alýda.
Sondai-aq málim bolǵandai, ortasha deńgeidegi jóndeý jumystary aiasynda eski jiektastar men aryq astaýlary qalanyń shetki aýdandaryndaǵy kóshelerdi jóndeýge qaita paidalanylatyn bolady.
Jumys sapary barysynda qala ákimi ár qurylys nysanyna jaýapty uiymdar týraly aqparattyq stend ornatýdy mindettedi.
