Nur Otan-nyń partiiaishilik sailaý ótkizý ge qatysty respýblikalyq kúntizbelik jospary bekitildi. Bul týraly partiia Tóraǵasynyń birinshi orynbasary Baýyrjan Baibek Facebook-tegi paraqshasynda jazdy, dep habarlaidy "Ult aqparat".⠀
«Partiiamyzdyń lideri Nursultan Nazarbaevtyń tapsyrmasymen Nur Otan praimerizi elimizdiń partiialyq-saiasi damý tarihynda tuńǵysh ret respýblikalyq partiiaishilik sailaý aýqymynda ótedi. Bul – Elbasynyń bastamasymen qolǵa alynǵan «Senim. Dialog. Bolashaqqa nyq qadam» partiia jumysyn «qaita jandandyrý» baǵdarlamasynyń qorytyndy kezeńderiniń biri. Bizdiń basty maqsatymyz – aldaǵy Májilis pen barlyq deńgeidegi máslihattar sailaýyna partiialyq tizimderge engizý úshin qoǵamnyń qoldaýyna ie bolǵan bedeldi partiia kóshbasshylaryn anyqtaý», - dedi Baýyrjan Baibek.⠀
Onyń aitýynsha, kandidattar praimerizge bastaýysh partiia uiymynyń atynan nemese ózin-ózi usyný jolymen de qatysýy múmkin. Bul rette partiianyń qundylyqtaryn ustanatyn jáne sailaý quqyǵy bar kez kelgen azamat úmitker bola alady.
«Búgin Ortalyq uiymdastyrý komitetiniń birinshi otyrysy ótti. Jiyn barysynda partiiaishilik sailaýdyń respýblikalyq kúntizbelik jospary bekitildi. Kandidattardy usyný jáne tirkeý 17 tamyzdan bastalyp 28 tamyzǵa deiin jalǵasady. Úmitkerlerge úgit jumystaryna daiyndalý úshin 7 kún beriledi - 31 tamyzdan 6 qyrkúiekke deiin.⠀
7 qyrkúiekten 3 qazanǵa deiingi aralyqta kandidattardyń úgit jumystaryn, onyń ishinde 14-30 qyrkúiek aralyǵynda jariia pikirsaiystar ótkizý qarastyrylǵan. Pikirsaiystar partiianyń resmi akkaýnttarynda taratylatyn «Praimeriz» aqparattyq júiesi arqyly ótedi», - dedi Baýyrjan Baibek.
Osyǵan bailanysty partiia Tóraǵasynyń tapsyrmasymen onlain formatta daýys berý úshin platforma ázirlendi.
«Praimeriz» júiesi turǵyndarmen keri bailanysty kúsheitýdi, jurtshylyqtyń pikirin eskere otyryp, túrli bastamalar men zań jobalaryn onlain-talqylaý múmkindigin kózdeidi. ⠀
1 qazan (00-00) men 3 qazan (14.00) aralyǵynda mobildi qosymsha jáne arnaiy veb-portal arqyly elektrondy daýys berýdi ótkizý josparlanyp otyr. Daýys berýdiń sońǵy kúni (3 qazan) bastaýysh partiia uiymdarynyń bazasynda sailaý ýchaskeleri ashylady. Internet joq eldi mekenderde osyndai sailaý ýchaskelerine kelip, qaǵaz biýlletender arqyly daýys berýge bolady. Kandidattardyń reitingi kórsetilgen praimeriz nátijeleri 5 qazanda jariialanady», - dedi Baýyrjan Baibek.
