«Nur Otan» partiiasy tóraǵasynyń birinshi orynbasary Baýyrjan Baibek jumys saparymen Túrkistan oblysyna baryp, Arys qalasyn qalpyna keltirý jumystarymen tanysty, dep habarlaidy "Ult aqparat" partiia baspasóz qyzmetine silteme jasap.
Aimaqqa sapary barysynda Baýyrjan Baibek partiianyń Túrkistan oblystyq jáne qalalyq filialynyń qyzmetkerlerimen, aýmaqtyq partiia filialdary tóraǵalarynyń birinshi orynbasarlarymen jáne óńirdegi bastaýysh partiia uiymdarynyń ókilderimen kezdesti.
Arys qalasynda bolǵan tótenshe jaǵdaidan keiin Elbasy men Memleket basshysy qalpyna keltirý jumystary qatań baqylaýda bolatynyn aityp, partiiaǵa naqty tapsyrmalar bergen edi. Soǵan bailanysty Baýyrjan Baibek Túrkistan oblysynyń ákimi Ómirzaq Shókeevpen birge qalanyń Ahymbekov jáne Qudaiberdiuly kóshelerinde jarylystan zardap shekken úilerdiń ornyna salynyp jatqan kóp páterli nysandardyń qurylysymen tanysty.
Jergilikti turǵyndarmen kezdesýde partiia Tóraǵasynyń birinshi orynbasary qurylystyń partiialyq baqylaýda ekenin aityp, úidiń jyl sońyna deiin paidalanýǵa beriletinin jetkizdi.
«Arystyqtarǵa qazaq halqynyń el bolyp kómek qolyn sozýy - birligimizdiń jarqyn kórinisi. Qalany qalpyna keltirý jumystary tolyq aiaqtalǵansha biz partiialyq baqylaýdy jalǵastyramyz. Bul – Elbasy, partiia tóraǵasy men Memleket basshysynyń tikelei tapsyrmasy», – dedi Baýyrjan Baibek.
Óz kezeginde Arys turǵyndary qoldaý kórsetken barsha Qazaqstan halqy men memleketke jáne «Nur Otan» partiiasyna sheksiz rizashylyq bildirdi.
Sondai-aq partiia tóraǵasynyń birinshi orynbasary A.Qojan kóshesinde ornalasqan Ibragimovter otbasynyń úiine bardy. Atalǵan úi apat saldarynan jaramsyz dep tanylyp, qaita salynǵan. Baýyrjan Baibek shilde aiynyń basynda Arysqa jasaǵan saparynda da bul úidiń jaǵdaiymen tanysyp, partiia tarapynan qoldaý kórsetiletinin aitqan bolatyn.
Elbasy, partiia tóraǵasy Nursultan Ábishuly Nazarbaev 21 tamyzda ótken partiia Saiasi keńesiniń keńeitilgen otyrysynda «Senim. Dialog. Bolashaqqa nyq qadam – «Nur Otan» partiiasynyń 7 serpini» atty partiia jumysyn júieli jańǵyrtý baǵdarlamasyn usynyp, birqatar basymdyqtardy anyqtap bergen bolatyn. Qazirgi tańda osy baǵytta aýqymdy jumystar qolǵa alynyp, júieli túrde júrgizilýde. Ásirese, halyqty alańdatqan áleýmettik máselelerdi oń sheshý, azamattardyń ál-aýqatyn jaqsartýǵa baǵyttalǵan memlekettik baǵdarlamalardyń tabysty ári ýaqytyly oryndalýyn partiialyq baqylaýdy qamtamasyz etý, qoǵamdy ortaq múddege jumyldyrý siiaqty igi isterde partiia óz belsendiligin kúsheite tústi.
Baýyrjan Baibek partiianyń Túrkistan oblystyq jáne qalalyq filialynyń qyzmetkerlerimen, aýmaqtyq partiia filialdary tóraǵalarynyń birinshi orynbasarlarymen kezdesýde osy máselelerge erekshe nazar aýdardy.
Osy rette aita keter jait, Túrkistan oblysy partiialyq jańǵyrý jumystaryn alǵashqylardyń biri bolyp qolǵa alyp, nátijeli júzege asyrýda. Búginde oblys ortalyǵynda Open space formatynda jumys isteitin qoǵamdyq qabyldaý bólmesi ashyldy. Endi bul jerde oblystyq filial tóraǵasynan bastap barlyq memlekettik mekemeniń ókilderi turaqty qabyldaýlar ótkizip turady.
Saiasi keńestiń keńeitilgen otyrysynda partiia tóraǵasy basa kóńil bólgen baǵyttardyń taǵy biri bastaýysh partiia uiymdarynyń jumysyn jandandyrý ekeni belgili. Sondyqtan partiia Tóraǵasynyń birinshi orynbasary Túrkistan oblysyna sapary kezinde «Lokomotiv» AQ «Túrkistan lokomotiv paidalaný deposy» bazasyndaǵy «Túrkistan stansasy» bastaýysh partiia uiymynyń belsendi múshelerimen kezdesti.
Kezdesýde Elbasy men Memleket basshysy júktegen mindetterdi júzege asyrýǵa ár partiialyqtyń belsendi qatysýy kerektigi jáne bastaýysh uiymdar partiianyń ózegi ekeni sóz boldy.
