Batys Qazaqstan oblysynda toi ótkizgen toǵyz turǵynǵa aiyppul salyndy, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindei, BQO Bas memlekettik sanitar dárigeriniń qaýlysyna sáikes tyiym salynǵanyna qaramastan, óńirde toi, saltanatty mereke, týǵan kún sekildi sharalardy uiymdastyrý derekteri áli de tirkelýde.
Atap aitqanda, 15-22 shilde aralyǵynda, bir apta ishinde 9 toi ótip, oǵan 20-dan 50-ge deiin adam qatysqan.
Monitoring toby Terekti aýdany Fedorov pen Abai, Jánibek aýdany Borsy men Jánibek, Qaratóbe aýdany Qaratóbe men Saraljyn, Jańaqala aýdany Birlik, Qaztalov aýdany jáne Syrym aýdany Jympity aýylynda karantin kezinde toi ótkizilgenin anyqtady.
Sonyń nátijesinde QR Ákimshilik quqyqbuzýshylyq kodeksi 425-baby 1-bóligine sáikes jeke tulǵalarǵa ákimshilik hattama toltyrylyp, 15 AEK kóleminde (41 myńnan astam teńge) aiyppul salyndy.
«Turǵyndardan karantin talaptaryn saqtap, kópshilik sharalardy uiymdastyrmaýdy ótinemiz. Tek sanitarlyq-epidemiologiialyq talaptardy saqtai otyryp qana indetti jeńe alamyz. Ózimiz ben ózimizdiń jaqyndarymyzdyń densaýlyǵyn saqtaiyq!» dedi departament mamandary.
