Batys Qazaqstan oblysynda orman otqa orandy, dep habarlaidy "Ult aqparat".
BQO TJ departamentiniń baspasóz qyzmeti málim etkenindei, oqiǵa 22 maýsym kúni Terekti aýdany Shaǵatai aýyldyq okrýginde boldy.
Saǵat 13.15-te Qyzyljar eldi mekeni mańynda 9,5 gektar alqapta orman (qaraǵash jáne terek) órtendi.
Oqiǵa ornynda TJ departamenti (41 adam, 4 tehnika), orman sharýashylyǵy mekemesi (40 adam, 3 tehnika), jergilikti atqarý organdary (10 adam, 2 tehnika) kúshteri jumys jasady.
«Tilsiz jaý» saǵat 18.20-da oqshaýlanyp, 22.14-te aýyzdyqtaldy.
«Qazgidromet» RMK málimetine qaraǵanda, 23 maýsym kúni oblysta 39 gradýs ystyq bolýy yqtimal.
BQO TJ departamenti sońǵy kezde kúnniń qatty ysýyna bailanysty tótenshe órt qaýpi saqtalyp otyrǵanyn eskertedi.
