Batys Qazaqstan jáne Atyraý oblystaryndaǵy Jaiyq ózenindegi tasqynnyń ekinshi tolqyny erekshe baqylaýda, dep málimdedi tótenshe jaǵdailar ministrliginiń (TJM) ókili Asqar Shárip.
Respýblikalyq aqparattyq shtabta ótken brifingtegi sózinde Asqar Shárip óńirlerde sý tasqynyna qarsy is-sharalar, azamattardy qulaqtandyrý, sý tasqyny saldaryn joiý jumystary jalǵasyp jatqanyn atap ótedi.
"Batys Qazaqstan jáne Atyraý oblystaryna Jaiyq ózeni arqyly Resei Federatsiiasy jaǵynan týyndaityn sý tasqynynyń ekinshi tolqyny erekshe baqylaýda qalýda. Ótken táýlikte Batys Qazaqstan oblysynda 81 523 qapshyq jáne 2 770 tonna inertti material tóseldi, bógetterdiń irgesin kóterý jáne nyǵaitý jumystary jalǵasýda", – deidi TJM ókili.
Onyń sózinshe, Atyraý oblysynda 824 myń qapshyq jáne 2 700 tonna inertti material tóseldi, 4 424 km bóget turǵyzyldy, bógetterdiń irgesin nyǵaitý jumystary jalǵasýda.
Jaiyq ózeniniń sý deńgeiine monitoring jalǵasýda, azamattardy qulaqtandyrý jáne teleradio arqyly habarlandyrý ár 4 saǵat saiyn júrgiziledi.
"Osy saǵatta 22 734 adam óz úilerine oraldy. 8 809 adam, onyń ishinde 3 828 bala evakýatsiialaý pýnktterinde. 4 536 turǵyn úi men 2 767 aýla aýmaǵynan sýdyń baǵyty buryldy. 11,2 mln astam tekshe metr erigen qar sýy soryp shyǵaryldy, 4,6 mln qapshyq jáne 1,4 mln astam tonna inertti material tóseldi", – dep jalǵady Shárip.
Jedel jeli telefonyna 2 114 qońyraý túsken.
"Aqmola, Aqtóbe, Atyraý, Batys Qazaqstan, Soltústik Qazaqstan oblystarynda úiler men aýmaqtardan sý sorý jumystary jalǵasýda. Avariialyq-qutqarý jáne sý tasqynyna qarsy jumystarǵa 36 484 adam, 5 083 tehnika, 888 sý sorý quraly, 381 júzý quraly, 16 áýe kemesi jumyldyryldy", – dep málimdedi Asqar Shárip.
