Búgin Almaty oblysy ákimi Amandyq Batalov Taldyqorǵan qalasynyń Qoǵamdyq palatasy múshelerimen kezdesti. Kezdesýge palatanyń 20-ǵa jýyq múshesi qatysty. Kún tártibinde oblys ortalyǵyn damytý máselesi sóz boldy.
Amandyq Batalov aldymen oblysta atqarylyp jatqan isterge toqtalyp, bolashaqtaǵy josparlarmen bólisti:
- Sizder menimen kezdesip, Taldyqorǵandy damytý máseleleri boiynsha pikirlesýdi qalaǵan ekensizder. Sondyqtan men eń aldymen oblysta atqarylyp jatqan jumystarmen qysqasha tanystyryp óteiin. Myna arnaiy qurylǵan stendter men maketterde oblysty damytýdyń negizgi baǵyttary men oblys ortalyǵyn odan ári órkendetý jospary kórsetilgen. Oblystyń kórsetkishteri barlyq salada jyldan jylǵa artyp kele jatqanyn sizderge nyq senimmen kórsete alamyn. Aýyl sharýashylyǵy óndirisiniń kólemi ósip, jalpy ónimdegi shaǵyn jáne orta biznestiń úlesi ótken jyly 50%-ke jetti. Qant qyzylshasyn ósirýdi belsendi damytyp, aq qant shyǵarý isin jolǵa qoidyq. Infraqurylymǵa kóp kóńil bóldik. Sonyń arqasynda, máselen, ótken jyly Alakól kóline millionnan astam týrist keldi. Áleýmettik salany da nazardan tys qaldyrmaimyz. Elbasynyń tapsyrmasyna sáikes biylǵy jyly kóp balaly jáne az qamtylǵan otbasylaryn qoldaýǵa arnaiy Áleýmettik karta jasadyq. Memlekettik-jekemenshik áriptestik sheńberinde birqatar mańyzdy nysandar salynýda. Olardyń qatarynda Taldyqorǵanda qurylysy bastalǵan olimpiiadalyq júzý basseini bar. Oblys ortalyǵy týraly aitsam, onyń damýyna erekshe kóńil bólip kelemiz. Tek biylǵy jyldyń ózinde 74 aýla alańdaryn abattandyrýdyń JSQ-lary jasaldy, olardyń 48-ine qazirdiń ózinde qarjy bólindi. Birneshe jyl boiy salynbai toqtap qalǵan qonaq úi ǵimaratynyń ornyna jataqhana salynatyn bolady, jataqhana aýmaǵyn Jeńis saiabaǵymen qosyp kórkeitemiz. Qabanbai batyr kóshesine de abattandyrý jasalady. Árine, kemshilikter de bar. Qalany gazdandyrý baiaý júrip jatyr. Mine, osy máselemen túbegeili ainalysýdy men búgin taǵaiyndalǵan qalanyń jańa ákimi Ǵalymjan Ábdiraiymovqa tapsyrdym. Biz birlesip jumys isteýimiz kerek. Sizder sózben de, ispen de bizge kómek jasaisyzdar dep senemin. Biz sizderdiń týǵan ólkeniń taǵdyryna beijai qaramaityn azamattyq belsendilikterińizdi baǵalaimyz, - dedi A.Batalov.
Óz kezeginde Taldyqorǵan qalasy Qoǵamdyq palatasynyń músheleri kásipkerlerdi qoldaý, aýyldyq jerlerde biznesti damytýǵa mikrokreditter jáne áleýmettik alý kómek alý siiaqty máselelerdi kóterdi. Sol siiaqty qatysýshylar gazdandyrý isin baqylaý maqsatynda ákimdik ókilderimen qalany aralaýǵa birge shyǵýǵa ýaǵdalasty.
