Almaty oblysy ákimi Amandyq Batalov aýdan, qala ákimderiniń «7-20-25» memlekettik turǵyn úi baǵdarlamasyn jergilikti jerlerde júzege asyrý jumystaryn qatań synǵa aldy. Búgin oblys basshysynyń tóraǵalyǵymen ótken jiynda osy másele qaraldy.
Máselen, Eńbekshiqazaq, Jambyl, Eskeldi, Qaratal, Panfilov, Aqsý aýdandarynda baǵdarlamanyń oryndalý kórsetkishi tómen. Al Kóksý, Ile, Sarqan, Alakól aýdandarynda alǵa jyljý bar ekeni baiqalady.
Óńirdiń árbir aýdan, qalalary boiynsha esepterin tyńdaǵan Amandyq Batalov turǵyn úi baǵdarlamasyn júzege asyrýdyń barlyq baǵyttaryn tolyǵymen qaita qaraýǵa bir apta ýaqyt berdi. Aýdan, qala ákimderiniń jumysyn osy kórsetkish boiynsha baǵalaitynyn da qadap aitty.
- Kóksý aýdanynan úlgi alyńdar, shaǵyn aýdan bolsa da, banktiń kelisimin 30 adam alyp úlgergen, 15-i kelisimshart jasasty. Al Almatynyń mańyndaǵy iri aýdandar qurylys qarqyndy júrip jatsa da, kóshten qalyp otyr. Turǵyn úi baǵdarlamasyn oryndaýda kimniń bar yntasymen jumys istep jatqanyn, al kimniń qol qýsyryp qarap otyrǵanyn osydan-aq kórýge bolady, - dedi A. Batalov.
Oblys basshysy ekinshi deńgeili bankterdiń ókilderine:
- «7-20-25» baǵdarlamasy – halyqty qoljetimdi baspanamen qamtýǵa arnalǵan Prezidenttik turǵyn úi baǵdarlamasy. Jergilikti atqarýshy organdar sizdermen qoian-qoltyq jumys isteýi kerek. Aldaryńyzǵa kelgen árbir turǵynǵa baǵdarlama boiynsha úi alýdyń sharttary men ondaǵy jeńildikterdi túsinikti, qarapaiym tilmen uǵyndyryp berýge tiissizder. Ázirge men mundai birlesken, tiimdi jumysty kórip turǵan joqpyn, - dedi.
Jiyndy qorytyndylaǵan Amandyq Batalov birinshi kezekte baǵdarlamaǵa qatysýshylar pýlyn qalyptastyrý kerektigin atap ótti. Soǵan bailanysty banktermen birlesken jumys naqty jolǵa qoiylýy tiis. Jumystyń ekinshi bóligi – turǵyn úiler salý. Biylǵy jyly «Nurly jer» baǵdarlamasymen 458 páter salý, sonyń 350-in Taldyqorǵanda salý josparlansa, biylǵy jyldyń qyrkúieginen bastap 2020 jyly salynatyn úilerdiń qurylysyna daiyndyq jumystaryn bastaý kerek. Bul oraida sharshy metriniń quny «7-20-25» baǵdarlamasynyń talaptaryna sáikes rettelýi tiis. Osyǵan bailanysty úi salýshylarmen kommertsiialyq turǵyn úilerdiń bir bóligin baǵdarlama arqyly ótkizý jóninde jumys júrgizý kerek. Sol siiaqty aqparattyq-túsindirý jumystaryn kúsheitip, BAQ arqyly da nasihatyn jandandyrý qajettigi aityldy.
- «7-20-25» baǵdarlamasyn iske asyrý - meniń jeke baqylaýymda. Bul jumysty meniń orynbasarym Jeńis Tuiaqovqa úilestiredi. Barlyq baǵytta jumysty kúsheitińder. Bir apta ýaqyt beremin. Árbir aýdan, qala ákimderi baǵdarlamanyń oryndalýyn jeke jaýapkershilikterine alsyn. Qol jetkizgen nátijeleriń jergilikti jerdegi jumystaryńnyń sapasyn aiqyndaityn bolady, - dedi A. Batalov.
