Áleýmettik jelilerde kvazimemlekettik sektor qyzmetkerleri qazaqstandyqtardyń JSN derekter bazasy arqyly basqa adamdar úshin halyq sanaǵynan ótedi degen habarlama tarap jatyr. Ulttyq statistika biýrosynda osy aqparatqa túsinikteme berdi, - dep habarlaidy "Ult aqparat".
Aqparat Qumash Telegram kanalynda paida boldy.
"Kvazimemlekettik sektordan kelgen aty-jóni belgisiz adam basqa Qazaqstan azamattarynyń ornyna onlain-sanaqtan ótýge májbúr bolatynyn aitty. Olarǵa JSN, jeke kýálik nómirleri, mekenjailary bar faildar jiberiledi. Ár qyzmetker 400 qazaqstandyqtyń atynan sanaqtan ótýi kerek", - dep habarlady arna avtorlary áleýmettik jelilerdegi hat almasýdyń skrinshottaryn tirkep.
Ulttyq statistika biýrosy mundai talap qoiylmaǵanyn aityp, aqparatty joqqa shyǵardy.
«Áleýmettik jelilerde adamdardan basqa azamattar úshin sanaq saýalnamasyn toltyrýdy suraityny týraly aqparat tarap jatyr. Ulttyq statistika biýrosy tarapynan mundai talap qoiylmaǵanyn resmi túrde málimdeimiz» deidi biýronyń baspasóz qyzmeti.
Mundai faktiler anyqtalǵan jaǵdaida sanaq.gov.kz saitynda kórsetilgen telefon nómirlerine habarlasý kerek.
Azamattardyń jeke derekteriniń qupiialylyǵyna zańmen kepildik beriledi.
«El azamattarynyń kóptegen ótinishteri boiynsha biýro tarapynan onlain sanaqty qaita qosý týraly sheshim qabyldandy. Ol halyq sanaǵynyń sońyna deiin qoljetimdi bolady. Elimizdiń barlyq turǵyndaryn mańyzdy is-sharaǵa belsendi qatysýǵa shaqyramyz» delingen biýro taratqan málimette.
