QR Densaýlyq saqtaý vitse-ministri - Bas memlekettik sanitariialyq dáriger Erlan Qiiasov shekteý sharalarynyń buzylý derekteri eń kóp tirkelgen óńirlerdi atady, dep habarlaidy "Ult aqparat".
«Monitoring toptardyń reid tekserýleriniń nátijesinde respýblika boiynsha ótken aptada karantin sharalaryn buzý faktileri anyqtalǵan nysandardyń jalpy úlesi 9,7 paiyzdy qurady. Shyǵys Qazaqstan, Almaty oblystarynda epidemiiaǵa qarsy shekteý sharalaryn saqtamaityn nysandar sanynyń aitarlyqtai artqany baiqalady», - dedi vitse-ministr Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, ótken aptada Shyǵys Qazaqstan oblysynda shekteý sharalaryn buzatyn nysandardyń úles salmaǵy 12-den 33 paiyzǵa, Almaty oblysynda 5-ten 12 paiyzǵa artqan.
«Ákimshilik quqyqbuzýshylyq týraly kodekstiń 425-babyna sáikes, shekteý sharalary talaptaryn buzǵany úshin Túrkistan oblysynda 237, Shyǵys Qazaqstan oblysynda 260, Almaty oblysynda 106 jáne Aqmola oblysynda 101 nysanǵa ákimshilik aiyppul saldy», - dedi Bas memlekettik sanitariialyq dáriger.
