QR Bas prokýratýrasy Qylmystyq qýdalaý qyzmeti basshysynyń orynbasary Eldos Qilymjanov qańtar oqiǵasyn tergeý barysyna qysym kórsetip jatqandar týraly aitty, dep habarlaidy QazAqparat.
«Qazirgi ýaqytta jekelegen adamdar áleýmettik jeliler men buqaralyq aqparat quraldary arqyly zańsyz talaptar qoiyp otyr. Olar qabyldanǵan protsestik sheshimdermen kelispegendikten, tergeýge qysym kórsetý maqsatynda qylmystyq isterdi tergeý barysyna aralasyp jatyr», - dedi Eldos Qilymjanov Ortalyq kommýnikatsiialar qyzmetinde.
Osy oraila ol qylmystyq-protsestik zańnamanyń talaptaryna sáikes, tergeý áreketterine qatysý boiynsha adamdardyń naqty tizbesine ruqsat etilgenin eske saldy. Olardyń qatarynda advokattar, qorǵaýshy taraptyń zańdy ókilderi, jábirlenýshiler bar. Bul adamdardyń prokýratýraǵa da, tergeý sotyna da tergeý organynyń is-áreketterine ótinishhat nemese shaǵym berýge quqyǵy bar.
Bul turǵyda Qylmystyq-protsestik kodeksinde protsestik sheshimderge shaǵym jasaýdyń naqty tártibi aiqyndalǵan.
«Osyǵan bailanysty qylmystyq protseske qatysýshylar men qorǵaýshylardy Zańnyń kórsetilgen normalaryn qatań saqtaýǵa shaqyramyn. Prokýratýra organdary barlyq qylmystyq ister boiynsha qylmystyq-protseske qatysýshylardyń quqyqtaryn saqtaýdy qamtamasyz etip otyrǵanyn atap ótemin. Qylmystyq isterdi tergeý kezinde quqyq qorǵaý jáne arnaiy organdardyń qyzmetine aralasqany úshin jaýaptylyq týraly Bas prokýratýra birneshe ret eskertkenin erekshe aityp ótkim keledi. Ózge adamdardyń sotqa deiingi tergeý barysyna aralasý áreketi úshin ákimshilik jáne qylmystyq jaýaptylyq qarastyrylǵan», - dedi Bas prokýratýranyń ókili.
Budan buryn habarlanǵandai, qazirgi kezde arnaiy prokýrorlardyń is júrgizýinde jappai tártipsizdikter boiynsha 53 jáne terrorizm aktilerine qatysty 32 qylmystyq is bar.
Memlekettik obektilerdi órtteý, múlikterdi joiý jáne terrorizm aktileri Almaty, Shymkent qalalarynda, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda jasalǵany belgili boldy.
