Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly tanymal ǵalym, shyǵystanýshy Ábsattar qajy Derbisáliniń otbasyna kóńil aitty, dep habarlaidy "Ult aqparat".
«Búgin tańerteń Qazaqstan musylmandary dini basqarmasyn 10 jyldan astam ýaqyt basqarǵan, din qairatkeri, akademik, kórnekti ǵalym Ábsattar qajy Derbisáliniń qaitys bolǵany týraly qaraly habar jetti. Marqumnyń otbasyna, týǵan-týystaryna, barsha musylman qaýymyna taǵy da kóńil aitamyn. Alla aldynan jarylqasyn. Imany salamat bolǵai. Ámin!», - dedi Bas múfti Ortalyq kommýnikatsiialar qyzmetinde ótken baspasóz máslihatynda.
Tanymal ǵalymnyń qaitys bolǵanyn búgin Aqparat jáne qoǵamdyq damý ministri Aida Balaeva áleýmettik jelidegi paraqshasynda jazdy.
«Belgili dintanýshy, shyǵystanýshy, islamtanýshy ǵalym Ábsattar qajy Derbisáliniń ómirden ozýyna bailanysty marqumnyń otbasy men jaqyn-týǵandarynyń qaiǵylaryna ortaqtasyp kóńil aitamyn. Bul búkil qazaq rýhaniiatyna ortaq aýyr qaiǵy. Ábsattar Baǵysbaiuly búkil sanaly ǵumyryn imandylyqqa arnap, asyl dinimizdiń týra jolyn halyqqa durys jetkizý isine ólsheýsiz eńbek sińirdi. Elimizdiń Bas múftii laýazymynda júrgen ýaqytta qajy aǵamyzben qyzmet barysynda jolyǵysyp turdyq. Qai kezde de óziniń keń minezimen, tereń bilimimen, parasatty bolmysymen rýhaniiat biiginen kórinip, elimizdegi ultaralyq kelisim men dinaralyq tatýlyqtyń órken jaiýyna ólsheýsiz úles qosqan jan edi. Ábsattar qajy aǵamyzdyń ziialy bolmysy, eline sińirgen eńbegi, jazǵan rýhani shyǵarmalary, jamaǵatty iman jolyna shaqyrýda aitqan aqyl sózderi – eshqashan tozbas rýhani qazyna bolyp halqynyń jadynda máńgilik saqtalady. Marqumnyń jatqan jeri jaryq, topyraǵy torqa bolyp, nury peiishte shalqysyn» dep jazdy ministr Instagram paraqshasynda.
QR Tuńǵysh Prezidenti Nursultan Nazarbaev ta Ábsattar Derbisáliniń qaitys bolýyna bailanysty marqumnyń otbasy men týǵan-týystaryna kóńil aitý jedelhatyn joldady.
Qazaqstannyń Tuńǵysh Prezidenti Ábsattar qajy Baǵysbaiuly sanaly ǵumyryn ǵylym jolyna, dini aǵartý salasyna arnaǵan parasaty biik, paiymy joǵary, aqjarqyn azamat bolǵanyn atap ótti. Jedelhatta kórnekti dintanýshynyń Qazaqstan musylmandary dini basqarmasynyń basshysy qyzmetin atqarǵan kezde múftiiat jumysyn jańa deńgeige kóterýge, elimizde dinaralyq tatýlyq pen ultaralyq kelisimniń nyǵaiýyna zor úles qosqany aitylǵan.
Ábsattar Baǵysbaiuly 1947 jyly 15 qyrkúiekte qazirgi Túrkistan oblysy Túlkibas aýdanynda týǵan. Ol – respýblikamyzdaǵy jas arabtaný ǵylymynyń negizin salýshylardyń biri. Arabistika salasy boiynsha elimizdiń tuńǵysh ǵylym doktory, tuńǵysh professory, tuńǵysh akademigi. Qoja Ahmet Iasaýi kesenesi men ondaǵy qulyptastardaǵy jazýlardy ana tilimizge aýdaryp, zerttedi. 2003 jáne 2006 jyldary qyrkúiekte Astanada álemdik jáne dástúrli ulttyq din liderleriniń sezderin ótkizýge úles qosty.
