Foto: Akorda.kz
Memleket basshysy Qasym-Jomart Toqaev 8 naýryz – Halyqaralyq áielder kúnine arnalǵan merekelik is-sharaǵa qatysyp, saltanatty jiynda sóz sóiledi.
Prezident ultymyzdyń dúnietanymynda áieldiń orny erekshe ekenin atap ótip, sulýlyq pen náziktik, meiirim men shapaǵat – bári de áielderden bastaý alatynyn jetkizdi.
– Shyn máninde, árbir adam úshin anadan uly, anadan qymbat eshkim joq. Eń qasterli qundylyqtarymyz «Jer-ana», «Otan-ana» uǵymdarymen tyǵyz bailanysty. «Ata uldy, ana ultty tárbieleidi» deidi. Bul sózdiń airyqsha mán-mańyzy bar. Ult bolashaǵy urpaq tárbiesinen bastalady. Ár balanyń jetistigi – ana mahabbatynyń jemisi. Uly Abai aitqan «Tolyq adamǵa» tán asyl qasietter urpaqtyń boiyna ana arqyly daridy. Qazir elimiz damýdyń mańyzdy kezeńine qadam basty. «Ádiletti Qazaqstandy» qurý úshin aýqymdy reformalardy qolǵa aldyq. Eń bastysy, el ishinde otanshyldyq, memleketshildik rýh myqty bolýy kerek. Biz kók bairaǵymyzdy biik ustaityn, bilimdi, ultjandy urpaq ósirýimiz kerek, – dedi Prezident.
Qasym-Jomart Toqaev «Jastarǵa salynǵan qarajat – eń utymdy investitsiia» ekenin atap ótip, qoǵamdaǵy áielderdiń róline erekshe toqtaldy.
– Qazir qyzdarymyz álemniń eń úzdik ýniversitetterinde bilim alyp jatyr. Jahandyq kompaniialarda jumys isteidi. San túrli kásipti meńgergen áielder qoǵamnyń túrli salasynda tabysty eńbek etip júr. Olardyń arasynda muǵalim, dáriger, memlekettik qyzmetshi, tárbieshi, tiginshi jáne basqa da mamandyq ieleri bar. Halyqaralyq jarystarda kók týymyzdy biikke kótergen sportshy arýlarymyz da az emes. Qanshama qyz-kelinshekter biznespen ainalysyp, myńdaǵan adamǵa jumys usynyp otyr. Men barshańyzdy maqtan etemin! Sizderge shynaiy rizashylyǵymdy bildiremin, – dedi Memleket basshysy.
Prezidenttiń aitýynsha, áielder ádil, dana ári tapqyr basshy bola alatynyn ómirdiń ózi dáleldep otyr. Qazir shaǵyn jáne orta biznestegi áielderdiń úlesi 42 paiyzǵa jetti.
– Bul – áielder kásipkerligine memleket tarapynan kórsetilgen júieli qoldaýdyń nátijesi. Byltyr óz kásibin ashqysy keletin 6 myńnan astam kópbalaly anaǵa arnaiy grant berildi. Aýyldaǵy qyz-kelinshekter biznespen belsendi ainalysatyn boldy. Myńdaǵan áiel biznes jobasyn júzege asyrýǵa memleketten sýbsidiia alatyn bolady. Bul maqsatqa jalpy somasy 250 milliard teńge jumsaldy, – dedi Prezident.
Memleket basshysy óziniń tapsyrmasymen Otbasy jáne genderlik saiasat týraly Jańa tujyrymdama qabyldanǵanyn, atalǵan qujat áielderdiń ózin-ózi damytýyna mol múmkindik berýge baǵyttalǵanyn atap ótip, árbir áiel otbasynda baqytty, qyzmette tabysty, qoǵamda belsendi bolýǵa laiyqty ekenin aitty.
Saltanatty jiyn sońynda Memleket basshysy «Arýana» úzdik áielder jobasy baiqaýynyń jeńimpazdaryn marapattady. Bul marapat ártúrli salada áleýmettik mańyzy bar jobalarmen ainalysyp, azamattyq qoǵamnyń damýyna eleýli úles qosyp júrgen isker áielderge on nominatsiia boiynsha tabystaldy.
Halyqaralyq áielder kúnine orai ótkizilgen «Arýana» úzdik áielder jobasy baiqaýy jeńimpazdarynyń tizimi:
1. «Agrobiznes salasyndaǵy úzdik joba» nominatsiiasy boiynsha – Aqshalova Aigúl Saǵymbekqyzy;
2. «Úzdik IT joba» nominatsiiasy boiynsha – Aqsholaqova Farida Amantaiqyzy;
3. «Kreativti indýstriia salasyndaǵy úzdik joba» nominatsiiasy boiynsha – Salihova Sáýle Halelqyzy;
4. «Jańa media salasyndaǵy úzdik joba» nominatsiiasy boiynsha – Nurǵalieva Ásem Bolatjanqyzy;
5. «Áielder men balalar quqyǵyn qorǵaý salasyndaǵy úzdik joba» nominatsiiasy boiynsha – Básenova Nesibeli Zarivanqyzy;
6. «Inkliýzivti damý salasyndaǵy úzdik joba» nominatsiiasy boiynsha – Álimjanova Arailym Maǵashqyzy;
7. «Ǵylym jáne innovatsiia salasyndaǵy úzdik joba» nominatsiiasy boiynsha – Derkach Marina Vladimirovna;
8. «Áielder men balalardyń belsendi quqyq qorǵaýshysy» nominatsiiasy boiynsha – Rakisheva Lázzat Bekmuhanbetqyzy;
9. «Kásiporynnyń úzdik áiel-basshysy» nominatsiiasy boiynsha – Tóleeva Fatima Nabidýllaqyzy;
10. «Áielder quqyqtaryn qorǵaý salasyndaǵy úzdik úkimettik emes uiym» nominatsiiasy boiynsha – Ryl Olga Vladimirovna.
