Senbi kúni Barselona men onyń mańynda COVID-19 juqtyrǵandar sanynyń ósýine bailanysty ekinshi 15-kúndik lokdaýn engizildi, dep habarlaidy EFE.
Jergilikti bilik shekteýlerdi sońǵy aptada COVID-19 virýsyna shaldyǵý oqiǵalarynyń sany aitarlyqtai ósip ketkennen keiin engizý týraly sheshim qabyldaǵan. Óńirlik úkimet jańa shekteý sharalary týraly juma kúni habarlap, turǵyndardan úilerinen asa qajet bolmasa shyqpaýyn surady. 10 adamǵa deiin jinalatyn qoǵamdyq sharalardy ótkizýge ruqsat berý týraly sheshim qabyldandy. Meiramhanalar men barlar adamdarǵa 50 paiyzǵa deiin tolyp jumys isteitin bolady. Al túngi klýbtar, kinoteatrlar, teatrlar men sport zaldarynyń jumysy toqtady.
Barselona men onyń astanalyq aimaǵy – Kataloniiadaǵy halyq tyǵyz ornalasqan aýdan, koronavirýs infektsiiasyna shaldyǵýdyń 70-ke jýyq paiyzy dál sol jerde anyqtalǵan.
Juma kúni aimaqtyq densaýlyq saqtaý organdary óńirde sońǵy 24 saǵatta jańa 1293 oqiǵa týraly habarlaǵan, sonyń ishinde indetke shaldyqqan 884 adam – Barselonanyń astanalyq aýdanynan.
Resmi málimet boiynsha, Kataloniiada pandemiia bastalǵannan beri COVID-19 juqtyrýdyń 80 700-den astam oqiǵasy tirkelgen.
Shekteýler Lerida qalasyna da tiesili. Osy aptanyń basynda Kataloniiada úlkendigi jaǵynan ekinshi orynda turǵan Ospitalet-de-Lobregat qalasynda arnaiy sharalar qabyldanǵan.
