Aqtóbelik ózin bank qyzmetkerimin dep tanystyrǵan adamǵa aldanyp qaldy. Ol bank shotyndaǵy 780 myń teńgesinen aiyryldy, dep habarlaidy QazAqparat.
Aqtóbe oblystyq politsiia departamentine 34 jastaǵy áiel habarlasyp, kómek surady.
Ol uialy telefon nómirine qońyraý shalǵan adamǵa senip, bank esepshotyndaǵy 780 myń teńgesinen aiyryldy.
«Banktiń «jalǵan» qyzmetkeri áieldiń senimine kirip, onyń shotynan 780 000 teńge aqshany jymqyrǵan. Aldanǵan áiel politsiiaǵa júgindi. Politsiia qyzmetkerleri kúdikti adamdy anyqtaýǵa jáne ustaýǵa baǵyttalǵan jedel is-sharalar júrgizip jatyr. Qylmystyq kodekstiń «Alaiaqtyq» baby boiynsha sotqa deiingi tergeý bastaldy. Osy baptyń sanktsiiasy boiynsha múlki tárkilenip, belgili bir laýazymdardy atqarý nemese belgili bir qyzmetpen ainalysý quqyǵynan úsh jylǵa deiingi merzimge aiyrylady.Tipti tórt myń ailyq eseptik kórsetkishke deiingi mólsherde aiyppul salýdy ne sol mólsherde túzeý jumystaryn ne bir myń saǵatqa deiingi merzimge qoǵamdyq jumystarǵa tartýdy ne tórt jylǵa deiingi merzimge bas bostandyǵyn shekteýdi ne sol merzimge bas bostandyǵynan aiyrý kózdelgen», - dedi oblystyq PD baspasóz qyzmetiniń jetekshisi Erbolat Sarqulov.
Politsiia departamenti derbes derekterdi, karta derektemelerin, internet banktegi jeke kabinettiń logini nemese parolin telefon arqyly basqa bireýge aitpaýǵa keńes beredi.
