Nur-Sultanda kúres túrlerinen ótip jatqan álem birinshiliginde qazaqstandyq Dáýlet Niiazbekov kúmis júlde aldy. 30 jastaǵy qazaq balýany 20 qyrkúiekte ótken finalda 23 jastaǵy Resei balýany, Daǵystanda týǵan Gadjymýrat Rashidovtan jeńildi.
Qazaqstan balýany finalǵa deiin Chan Iýi-Siýandy (Qytailyq Taipei) 10:0 esebimen, germaniialyq Aleksandr Semisorovty 12:8 esebimen, shirek finalda mońǵoliialyq Temer-Ochirin Týlgany 6:2 esebimen jeńdi. Al jartylai finalda úndistandyq, byltyrǵy álem chempionatynyń kúmis júldegeri, 65 keli boiynsha álemdik reitingte 1-orynda turǵan Badjrang Pýniiadan (Úndistan) basym tústi. Bul beldesý 9:9 esebimen teń aiaqtaldy. Biraq kezdesý kezinde Niiazbekov tórt upailyq ádis jasaǵany úshin jeńimpaz dep tanyldy.
Niiazbekov buǵan deiin 2011 jylǵy álem chempionatynda qola alǵan. Ol – erkin kúresten Aziia chempionatynda alty jyl qatarynan júlde alǵan qazaqstandyq sanaýly balýandardyń biri. Qazaqstan balýany 2015, 2016 jáne 2018 jyly – altyn, 2013, 2014, 2017 jyldary qola medal ielendi.
Niiazbekov álem chempionatynyń júldegeri retinde 2020 jyly Tokioda ótetin olimpiada oiyndaryna joldama aldy.
14 qyrkúiekte bastalǵan Nur-Sultandaǵy álem chempionaty 21 qyrkúiekte aiaqtalady. Qazirge deiin Qazaqstanda eki kúmis, tórt qola medal bar. Kúmis júldeni grek-rim kúresinen Qorlan Jaqansha ielense, Almat Kebispaev, Meirambek Ainaqulov (ekeýi de - grek-rim kúresi), Nurislam Sanaev (erkin kúres) jáne Valentina Islamova (áielder kúresi) qola medal aldy.
