17 shilde kúni Balqash kóliniń jaǵalaýynda Metallýrg kúnine arnalǵan Metallurg Fest merekelik festivali ótti. Aýqymdy kontsertke qala turǵyndary men qonaqtary, kásiporyn qyzmetkerleri, sala ardagerleri jáne olardyń otbasy músheleri jinaldy.
Metallýrg kúni Balqash qalasy úshin airyqsha mańyzǵa ie. Sebebi qalanyń tarihy men damýy metallýrgiia óndirisimen tyǵyz bailanysty. Bul mereke – kásiporynnyń, qalanyń jáne otandyq ónerkásiptiń damýyna úles qosyp júrgen eńbek adamdaryna kórsetilgen qurmettiń belgisi.
Qonaqtarǵa mazmundy kontserttik ári oiyn-saýyq baǵdarlamasy usynyldy. Merekelik alańda interaktivti aimaqtar, balalarǵa arnalǵan oiyn alańdary, sondai-aq metallýrgterdiń eńbegi men «Qazaqmys» kompaniiasynyń tarihyna arnalǵan ortaq art-panno jasaýǵa arnalǵan keńistik uiymdastyryldy.
Mýzykalyq baǵdarlamany Timur Teams ujymy men ánshi IL’HAN ashty. Kórermender Balqash mys balqytý zaýytynyń qyzmetkerleri Ersultan Sákenov pen Ádiljan Bisenbaevtyń ERS & Adilzhanym sahnalyq ataýymen jasaǵan ónerin erekshe yqylaspen qabyldady. Metallýrgterdiń ómiri men eńbegine arnalǵan ánderi kópshiliktiń júreginen oryn tapty.
Keshtiń erekshe kórinisteriniń biri CrossFire toby usynǵan «Saltanat» jaryq shoýy boldy. Onda ulttyq naqysh, zamanaýi horeografiia jáne jaryq effektileri úilesim tapty.
Sahnada sondai-aq Bolat Qusaiynov, Janar Duǵalova jáne aty ańyzǵa ainalǵan «Ialla» vokaldy-aspaptyq ansambli óner kórsetti. Keshtiń basty mýzykalyq oqiǵasy – «Irina Kairatovna» tobynyń kontserti boldy. Tanymal ujym Balqash kóliniń jaǵalaýyn ashyq aspan astyndaǵy úlken bi alańyna ainaldyrdy.
Kontsert barysynda túrli taqyryptyq interaktivter uiymdastyrylyp, kórermendermen erkin formatta bailanys ornatyldy. Júrgizýshiler Marat Oralǵazin men Erkebulan Myrzabek qonaqtarǵa qorshaǵan ortaǵa uqypty qaraýdyń jáne mereke ótken aýmaqtyń tazalyǵyn saqtaýdyń mańyzyn eske salyp otyrdy.
Merekelik kesh metallýrgterge arnalǵan áserli otshashýmen aiaqtaldy. Qonaqtardyń qaýipsizdigin quqyq qorǵaý organdarynyń qyzmetkerleri qamtamasyz etti. Kontsertten keiin kommýnaldyq qyzmet mamandary men belsendi turǵyndar jaǵalaý aýmaǵyn tazalap shyqty.
Metallýrg kúnin merekeleý Balqash jurtshylyǵyn taǵy da ondaǵan jyldar boiy qalanyń bolmysyn, eńbek dástúrin jáne bolashaǵyn aiqyndap kele jatqan mártebeli mamandyq tóńiregine toptastyrdy.
