Foto: ashyq derekkóz
Astana qalasynyń prokýratýrasy elordada áriptesterin aldap, jalǵan aqparat arqyly aqsha jinaǵan áielge qatysty sot úkimi shyqqanyn málimdedi, dep habarlaidy Ult.kz.
Is materialdaryna sáikes, Baiqońyr aýdanynyń prokýratýrasy alaiaqtyq deregi boiynsha memlekettik aiyptaýdy qoldaǵan. Sottalǵan áiel dekrettik demalysta júrip, bir jyl boiy áriptesterin júieli túrde jańylystyryp otyrǵan.
Ol otbasynda qaiǵyly jaǵdailar oryn alǵany týraly, sonyń ishinde anasynyń qaitys bolǵany jáne balasynyń aýyr hálde ekeni jóninde kórineý jalǵan málimetter taratqan. Áieldiń sózine sengen áriptesteri oǵan janashyrlyq tanytyp, kómek kórsetý maqsatynda aqsha aýdaryp otyrǵan.
Nátijesinde jábirlenýshilerge 2 million teńgeden astam materialdyq shyǵyn keltirilgen.
Sot jeńildetetin mán-jailardy, atap aitqanda aiyptalýshynyń kinásin moiyndaýyn, shyn júrekten ókinýin jáne keltirilgen zalaldy ishinara óteýin eskergen. Osyǵan bailanysty oǵan 3 jyl merzimge probatsiialyq baqylaý belgilenip, bas bostandyǵyn shekteý jazasy taǵaiyndaldy.
Úkim zańdy kúshine endi.
