QR Aqparat jáne qoǵamdyq damý ministri Aida Balaeva TiJi, Nickelodeon kanaldarynyń nelikten qazaqshaǵa aýdarylyp jatqanyn túsindirdi, dep habarlaidy QazAqparat.
«Sheteldegi tanymal mýltfilm kanaldardyń ónimderin qazaq tiline aýdarý jobasyn jyldyń basynan bastap kettik. Olar: TiJi, Nickelodeon mýltfilm kanaldary. Olarmen kelissóz ótkizilip, qazir «Qazaqfilm» bazasynda aýdarýǵa kiristik. Jyldyń sońynda bul jumys bitedi. Bul degenimiz Nickelodeon men TiJi mýltfilmderi qazaqsha sóileidi degen sóz. Bul óte mańyzdy. Ne úshin? Qazaq tili otbasynan bastalady. Búginde taza qazaq tildi otbasylardaǵy balalardyń, kishkentai búldirshinderdiń tili oryssha shyǵyp jatqany eshkimge de jasyryn emes. Bul - sol mýltfilmderdiń saldary. Ókinishke orai, tildi tek ata-ana ǵana emes, ekranda qalyptastyratyn zaman boldy. Tili taza qazaqsha shyqqan balanyń sol mýltfilmniń yqpalymen ary qarai oryssha shúldirlep jatqany ras. Sondyqtan osy telearnalardy kelissózge shaqyryp, 800 saǵat ónimin qazaq tiline aýdaryp jatyrmyz. Salystyrmaly túrde aitar bolsaq, barlyq búldirshin súiip qaraityn «Masha i medved» mýlfilmniń 1 maýsymyn túsirýge 2 mlrd teńge jumsalady eken. Ol ne bári 2-aq saǵattyq ónim. Al biz tanymal mýltfilm kanaldardyń 800 saǵattyq ónimin 4 ese arzanǵa jasap jatyrmyz. Ózimiz sapaly ónimder jasaityn bolsaq, onda ol úlken qarajatty talap etedi. Uzaq ýaqyt ótedi. Qazir ár ýaqytta tiimdi paidalanýymyz kerek. Sol sebepti qazir búldirshinderimiz kórip jatqan kanaldardyń bárin qazaq tiline aýdarsaq, balalarymyz qazaq tilinde kórse, onda olardyń qazaq tilinde sóiletindigi anyq. Balalarymyz qazaq tilinde sóilesin desek, ekrandy túzetýimiz kerek. Ekran qazaqsha bolýy kerek», - dedi Aida Balaeva Ortalyq kommýnikatsiialar qyzmetindegi baspasóz máslihatynda.
Ministr balalardyń birneshe tildi bilgeni de durys ekendigin basa atap ótti.
«Búgin Prezident: «Kóp tildi bilý bala úshin, balanyń bolashaǵy úshin úlken múmkindikter, dep jaqsy aitty. Sondyqtan balalarymyzdyń tili qazaqsha orys jáne basqa da tilderdi ońai úirenip alady», - dedi ol.
