Qazaqstannyń jetekshi infektsionist dárigeri, meditsina ǵylymdarynyń doktory Dinagúl Baesheva balalarǵa juqqan koronavirýs sirek kezdesetin qandai sindromdarǵa soqtyrýy múmkin ekendigin aitty, dep habarlaidy QazAqparat.
«Qazir qoǵamda ártúrli pikir bar. Solardyń birine qulaq asyp otyrsaq, balalardyń boiynda immýnitet qalyptasý úshin olar koronavirýsty bir ret juqtyryp, jazylýy kerek deidi. Biraq bul máselege kelgende meniń kózqarasym basqasha. Eger bala koronavirýs juqtyryp alsa onda ol – virýs juqtyrýshy bolmaq. Ekinshiden frantsýz, italian jáne amerikalyq ǵalymdar balalarǵa juqqan koronavirýs «kavasaki» atty sirek kezdesetin sindromǵa ákep soǵýy múmkin ekenin aitady. Sol úshin balalardyń basyn mundai qaýipke tigýge bola ma!? Meniń oiymsha, álbette qajet emes», - dedi Dinagúl Baesheva Densaýlyq saqtaý ministrliginiń Facebook-tegi parashasyndaǵy onlain suhbatynda.
Meditsina mamany sol sebepti balabaqshalardan bastap mektepterde epidemiiaǵa qarsy sharalardy qabyldaý kerektigin aityp ótti.
«Balalar qolyn jýyp, antiseptikti paidalanýy kerek. Olardy barynsha qashyqtyqta ustaǵan abzal. Tósek oryndary bir-birine tym jaqyn ornalaspaýy tiis. Tósekterdiń arasy kem degende bir metr bolýy tiis. Sonymen qatar balabaqshaǵa kelgen balada koronavirýs bar ma, joq pa – anyqtap otyrý kerek», - dedi ol.
