Almaty oblysynyń Baǵanashyl shaǵyn aýdanyndaǵy №1 balalar úiinde táribelenýshilerdiń shottarynan qomaqty qarajat jymqyrdy dep kúdikke ilingen áleýmettik pedagogtyń isi sotqa joldandy, dep habarlaidy "Ult aqparat".
Bul týraly Bala quqyqtary jónindegi ýákil Arýjan Sain óziniń Facebook-tegi paraqshasynda jazdy.
«Bylty tamyz aiynda maǵan Baǵanashyldaǵy №1 Almaty oblystyq balalar úiiniń túlekteri men táribelenýshileri júgindi. Olardyń memlekettik járdemaqy men áleýmettik kómek aýdarýǵa arnalǵan shottarynan aqsha urlanǵan. Balalar maǵan óz shottarynan birneshe jyl boiy bankomattar arqyly qolma-qol aqsha alynǵanyn, dúkenderde tólem jasap, basqa tulǵalardyń kartalaryna aqsha aýdarylǵanyn dáleldeitin úzindi kóshirmeler kórsetken bolatyn» - dep eske alady Arýjan Sain.
Eske salsaq, tamyzdyń aiaǵyna qarai osy oqiǵa boiynsha arnaiy jedel tergeý toby qurylyp, 30 jastaǵy kúdiktini Taraz qalasynda qolǵa túsirgen bolatyn.
Al biyl aqpan aiynda Almaty qalasyndaǵy Ekonomikalyq tergeý departamenti Qylmystyq Kodekstiń 189-babynyń 4-bóliginiń 2-tarmaǵy boiynsha tergep-tekserý jumystaryn bastady.
«Qazir áleýmettik pedagogqa qatysty asa iri mólsherde senip tapsyrylǵan bóten múlikti iemdený nemese talan-tarajǵa salý (QR QK 189-baby 4-bóligi) jáne balalar úiiniń direktoryna qatysty nemqurailylyq (QR QK 371-baby 1-bóligi) faktileri boiynsha qylmystyq ister sotqa joldandy. Almaty qalasynyń ekonomikalyq tergeý departamentine osy oraida alǵys bildiremin jáne balalar quqyqtarynyń óreskel buzylýyna jol bergen tulǵalar laiyqty jazaǵa tartylady dep úmittenemin. Eń bastysy, balalarǵa keltirilgen zalal tezirek jáne tolyq kólemde óteledi. Sot pen prokýratýra buǵan erekshe nazar aýdarady dep senemin», - dep jazdy ýákil.
