Jýyrda Ǵ.Músirepov atyndaǵy Qazaq memlekettik akademiialyq balalar men jasóspirimder teatry 74-maýsymyn bastady. Bul maýsym rejisser Erjan Qaýlanov qoiǵan aǵylshyn dramatýrgi Rei Kýnidiń «№13» komediiasynyń premerasymen ashyldy.
Á degennen-aq teatr ujymy erekshelenýge tyrysypty. Maýsymnyń ashylýyna óner maitalmandary men ziialy qaýym jáne BAQ ókilderin ǵana emes, shoý-biznes, toi biznes ókilderi, ánshi-prodiýserlerdi de qosa shaqyrǵan. Tipti olardyń qatarynda atyshýly Ninety one toby da bar. Ádette bul topty kópshilik sharaǵa kóp adam tartý úshin «qoldanatyny» belgili. Sonymen qatar barlyq qonaqtardy qyzyl kilemmen júrý rásimin uiymdastyrǵan. Qyzyl kilemmen júrip ótkenderdiń qatarynda «Jigitter» toby, prodiýser Baian Maqsatqyzy, Aiqyn Tólepbergen siiaqty shoý-biznes ókilderi de bar.
Rei Kýnidiń «№13» komediiasyn qazaqshaǵa aýdarǵan – Erkin Jýasbek. Richard rólinde – Maqsat Sábitov, Djein Ýorzington – Aida Jantileýova, Djord Pigden – Erbol Sadyrbai.
Ironiialyq satiraǵa bai Rei Kýnidiń «№13» komediiasy balalar men jasóspirimderge arnalǵan teatrda qalai sahnalanady degende bul qalai bolar eken dep eleń ete qaldyq. Spektakldiń sýretshisi Aidana Bisembaeva bar ónerin salypty-aq. Shymyldyqtyń ashylǵanynan qaltaly azamattar toqtaityn qymbat ári ádemi qonaqúidiń №13 bólmesi beinelenedi. Esik-tereze, shkaf, qonaq úi jihazdary bári de óz ornyn taýyp ornalastyrylǵan.
Áńgimeniń qonaqúiden bastalǵanynan-aq túsine berińiz. Saiasi sheneýnik Richard pen qarsylas partiianyń ókili Djein Ýorzingtonnyń arasyndaǵy jeke qarym-qatynas sýretteledi. Spektakldiń basynda aq sheshingen Djein – Aida Jantileýovanyń obrazy jurtty eleń etkizdi.
Daiashynyń da qylyqtary ersi kórinedi. Eýropaǵa ǵana tán qylyqtar, qyzminezdi erkek beinesi ashyq kórsetildi.
Richard pen Djeinniń bir-birine yntyq sezimi men seksýaldyq kózqarastary da anyq baiqalady. Otbasyly erkek pen kúieýi bar áieldiń ashynalyq qarym-qatynasynyń oqiǵasyn balalar men jasóspirimder teatrynan kórsetý – qazaq ónerine jat kórindi.
Teatr direktory komediialyq qoiylymnyń aitar oiyn izdemeý kerek dese de, rejisser Erjan Qaýlanov pen aýdarmashy Erkin Jýasbek bul jumysqa kiriskende spektakldiń qazaq teatrynda, onyń ishinde balalar men jasóspirimder teatrynda qoiylatynyn eskermegen siiaqty.
Rei Kýnidiń «№13» komediiasy álemdik tájiribede kassalyq komediia bolǵanymen, qazaq teatrynyń balalar men jasóspirimder baǵytynda kórsetilýine erte emes pe degen oi keldi bizge.
Al, siz qalai oilaisyz?..
A.Musabek
(Sýretterdi túsirgen avtor)
