QR Bilim jáne ǵylym ministri Kúlásh Shámshidinova Atyraý oblysyna jasaǵan jumys sapary aiasynda Mahambet aýdanyndaǵy D. Túlenov atyndaǵy mektep-gimnaziiaǵa bardy, dep habarlaidy QazAqparat tilshisi.
Aýyl muǵalimderimen suhbat kezinde ministr memlekettiń áleýmettik saiasatynyń basty baǵyttaryna toqtalyp, bilim salasyndaǵy reformanyń negizgi tustaryna nazar aýdardy. Sondai-aq búginde qyzý talqylanyp, qabyldanýy kútilip otyrǵan «Pedagogtyń mártebesi týraly» Zańyna qatysty muǵalimderdiń suraǵyna jaýap berdi.
«Búginde basty kapital - adam. Bul kapitaldyń qundylyǵy onyń bilimdiligimen, intellektýaldyq damýymen ólshenedi. Sondyqtan oqýshylardy alǵan bilimderin taldap, jinaqtaýǵa úiretýimiz qajet. Ǵylym men bilimniń zańdary eshqaida ketken joq degim keledi. Bizdiń búgingi mindetimiz - mektep oqýshylaryn bilim alýǵa umtylýǵa baýlý», - dedi K. Shámshidinova.
