Foto: inform.kz
Qazirgi tańda respýblika boiynsha mektepke deiingi uiymdarda 15 myńǵa jýyq tárbieshi jetispeidi. Bul týraly Oqý-aǵartý ministrligi Erte jastaǵy balalardy damytý institýtynyń direktory Manara Adamova málimdedi, dep habarlaidy Sputnik Qazaqstan.
Onyń aitýynsha, maman tapshylyǵyna jalaqynyń azdyǵy sebep bolyp otyr.
"Búgingi tańda 15 myńdai tárbieshi jetispeidi. Árine, birinshi sebebi, jasyratyny joq, jalaqynyń azdyǵy. Jalaqy az bolǵannan keiin jas mamandar tarapynan qyzyǵýshylyq joq. Sodan keiin jumys istep júrgen mamandar biraz tájiribe jinaǵannan keiin ailyǵy kóp mektepke aýysyp ketip jatady. Ainalyp kelgende barlyǵy jalaqynyń azdyǵyna bailanysty bolyp tur", - dedi Adamova ortalyq kommýnikatsiialar qyzmetinde ótken baspasóz máslihatynda.
Ol balabaqsha sany kóp óńirlerde tapshylyq qatty seziletinin atap ótti. Olar Túrkistan men Almaty oblystary, Astana qalasy.
Institýt direktorynyń málimetinshe, Qazaqstanda 11 104 mektepke deiingi uiym bar. Onyń ishine balabaqshalar da, shaǵyn ortalyqtar da kiredi. Olarda 1 millionnan astam búldirshin tárbielenip jatyr. Balabaqshalardyń 70 paiyzy qazaq tilinde tárbie beredi.
