Koronavirýsqa qarsy Pfizer vaktsinasyn saldyrǵan Óskemen qalasynyń turǵyny Janerke Sadý qazirgi qal-jaǵdaiymen bólisti, dep habarlaidy QazAqparat tilshisi.
Elimizde balalar men jasóspirimderdi, júkti jáne bala emizetin áielderdi amerikalyq Pfizer vaktsinasymen egý naýqany júrgizilýde. Shyǵys Qazaqstan oblysynda vaktsina saldyryp jatqan osy sanattaǵy adamdar az emes. Solardyń qatarynda Óskemen qalasynyń turǵyny Janerke Sadý da bar.
«4 jarym ailyq ulymnyń esimi – Shoqan. Qaýipti dertten ózimdi jáne balamdy qorǵaý úshin Pfizer vaktsinasyn aldym. Elimizde COVID-19 infektsiiasyna qarsy vaktsinalaý alǵash bastalǵan kezde endi bala kótergen edim. Sol kezde virýs juǵyp ketpesin dep qatty qorqyp, saqtyq sharalaryn qatań saqtap júrdim. Endi mine, ekpe saldyrý múmkindigi paida bolǵanyna qýanyshtymyn», - dedi ol.
Janerke Sadý óz sózinde qazirgi jaǵdaiynyń qalypty ekendigin, ózin jaqsy sezinetindigin jetkizdi.
