Qostanai oblysynda 219 kópbalaly otbasy baspana kiltine ie bolady. Bul týraly Qostanai oblysynyń qurylys, sáýlet jáne qala qurylysy basqarmasy habarlama taratty, - dep habarlaidy "Ult aqparat".
Óńirde turǵyn úi qurylysyna airyqsha mán berilmek. Qarjylandyrý kólemi artyp, az qamtylǵan otbasylardy baspanamen qamtamasyz etý úshin arnaiy jobalar qabyldandy. Máselen, osy jyly Qostanai qalasynda halyqtyń áleýmettik osal toptary úshin jalǵa beriletin 7 úidiń qurylysyna 2 mlrd teńge baǵyttaldy. Amangeldi, Denisov, Jitiqara, Meńdiqara jáne Naýryzym aýdandaryna taǵy 1,2 mlrd teńge bólindi. Bes aýdanda 5 kóppáterli úi qaita jańartylady. Olardyń bári kópbalaly otbasyna arnalǵan.
«Kópbalaly otbasylardy turǵyn úimen qamtamasyz etý úshin 108 páter satyp alyndy. Bul maqsatta 900 mln teńge qarastyryldy. Onyń ishinde 840 mln teńge Qostanai qalasynyń enshisinde. «Nurly jer» jáne «Baqytty otbasy» baǵdarlamalary aiasynda az qamtylǵan otbasylar nesielik úide turýǵa múmkindik alady. Qazirdiń ózinde 1,5 mlrd teńgege 219 ótinim tústi. Barlyq ótinim maquldandy», -deidi Qostanai oblysynyń qurylys, sáýlet jáne qala qurylysy basqarmasynyń basshysy Berik Tańjaryqov.
Qazirgi ýaqytta 36 kópbalaly jáne múgedek balasy bar 28 otbasy páter kiltine ie boldy.
