Elorda ákimi Baqyt Sultanov aýa raiynyń qolaisyzdyǵyna bailanysty qala turǵyndaryn jolda abai bolýǵa shaqyrdy, dep habarlaidy "Ult aqparat".
«Aýa raiynyń kúrt buzylýyna bailanysty qala kóshelerinde muqiiat bolýlaryńyzdy suraimyn. Meteoqyzmet málimetterine sáikes, 15 sáýir kúni Nur-Sultan qalasynda jaýyn-shashyn kútilýde (jańbyrdyń sońy qarǵa ulasýy múmkin). Kóptegen kólik ieleri dóńgelekterin jazǵy maýsymǵa aýystyryp úlgerdi. Sondyqtan, kólik júrgizýshilerine jol araqashyqtyǵyn saqtap, jol erejesin buzbaýdy jáne oqys manevr jasaýdan bas tartýdy usynamyz. Jolda abai bolyńyzdar!», - dep jazdy Baqyt Sultanov Feisbýktegi paraqshasynda.
«Qazgidromet» RMK elordada kún raiynyń nasharlaýyna bailanysty eskertý jariialaǵan bolatyn. Jańbyr sońynan qar jaýyp, soltústik-shyǵystan soqqan jeldiń ekpini 15-20 m/s artýy yqtimal. Kúndiz temperatýra +3...+5 gradýs. Atmosferalyq aýa odan ári tómendeýi múmkin. Sondai-aq naizaǵai, tuman boljanady.
