Bahrein Koroldiginde Qazaqstandyq 36 boijetkendi tánin saýdalaýǵa májbúrlegender sottaldy, dep habarlaidy QazAqparat.
Shymkenttiń qylmystyq ister jónindegi mamandandyrylǵan aýdanaralyq soty transulttyq uiymdasqan top quryp, tórt jyl boiy adam saýdasymen ainalysqandarǵa úkim kesti. 16 sottalýshynyń aldy 14 jylǵa jaza arqalady. Sot zalynda buǵan deiin úiqamaqta bolǵan bir azamattyń qolyna kisen salyndy. Úsh jylǵa jaza arqalaǵan ol jazasyn qaýipsizdigi barynsha joǵary túzeý koloniiasynda óteitin bolady. Al, úsh aiyptalýshy qamaýdan bosatyldy.
«Olar sot úkimimen qylmystyq jaýaptylyqtan bosatyldy. Óitkeni Qylmystyq kodekstiń 68-shi babynyń ekinshi bóliginiń talaptary boiynsha olar jábirlenýshilermen tatýlassa jáne olarǵa keltirilgen zalaldyń mólsherin ótese, jazadan bosatylýǵa bolady degen qaǵidalar bar. Sot olardyń árqaisysynyń tek qana bir bir qylmystyq árekteterge qatystylyǵy ekendigin, ár qaisysynyń jasóspirim balalary bar ekendigin, olardyń asa bir qoǵamǵa qaýip týdyryp turmaǵanyn eskere kele osy bapty qoldaný durys degen sheshimge keldi», - dedi isti qaraǵan sot tóraǵasy Ábsattar Shaihiddinov.
Aita óteiik, bul qylmystyq top 2016 jyldan bastap 2020 jylǵa deiin el aýmaǵynda Bahrein Koroldigine jezókshelikpen ainalysý úshin qyzdardy jaldaýmen jáne jiberýmen ainalysyp kelgen. Olardyń basym bóligi Túrkistan oblysy men Shymkent qalasynyń týmalary. Jábirlenýshiler de osy eki óńirdiń qyzdary. Olardy aiyptalýshylar «kóp aqsha tabasyń» dep aldap shet el asyryp, qujattaryn alyp qoiǵan. Sóitip jezókshelikke jekken. Negizinen qarmaqtaryna turmysy tómen jandardy túsirip kelipti. 150 tomdyq qylmystyq is boiynsha basty figýrant - 36 jastaǵy kelinshek. Ol Bahrein Koroldigine Qazaqstan aýmaǵynan jas qyzdardy jetkizip otyrǵan. Qylmystyq top basshysy adam saýdasy boiynsha tórt jyl kóleminde jalpy somasy 48 mln teńgeden astam tabys tapqany anyqtalǵan.
«Qazaqstannan árbir jiberilgen qyzdar úshin eki myńnan bes myń dollarǵa deiin aqsha túsip otyrǵan. Jáne ol aqshany negizinen sol Azadova Saodattyń ózi alyp, sol kisi basshylyq jasap otyrǵan. Osyndai jolmen 2016 jyldan 2020 jylǵa deiin 36 jábirlenýshi qyzdy jibergen. Aralarynda onyń ishinde kámeletke tolmaǵandar da bar», - dedi sýdia.
