Oralda erler men áielder eki bólek zalda otyrǵan toidyń videosy áleýmettik jelide keńinen tarady. Erekshe formattaǵy merekege prodiýser Baian Alagózova da pikir bildirip, mundai úrdisti qazaqtyń dástúrli toi mádenietine jat dep baǵalady, dep habarlaidy ult.kz.
Áleýmettik jelide jariialanǵan kadrlardan toi qonaqtarynyń erler men áielder bolyp eki zalǵa bólingenin baiqaýǵa bolady. Er azamattar bir jerde otyrsa, áielder bólek zalda otyrǵan. Tipti toidyń basty keiipkerleri — qalyńdyq pen kúieý jigit te merekeni eki bólek zalda ótkizgen.
Qonaqtarǵa qyzmet kórsetý kezinde de osy tártip saqtalǵan. Áielder otyrǵan zalda qyz-kelinshekter, al erler zalynda er adamdar daiashy bolǵan.
Bul kórinis jeli qoldanýshylarynyń arasynda túrli pikir týǵyzdy. Keibiri toidy uiymdastyrý tásilin árkimniń jeke tańdaýy dep sanasa, endi biri mundai formattyń qazaqtyń dástúrli toilaryna tán emes ekenin jazdy.
Oqiǵaǵa prodiýser Baian Alagózova da ún qatyp, óz oiyn áleýmettik jelidegi paraqshasynda bildirdi.
«Qazaqtar óz dástúrlerinen óz erkimen, jurttyń kózinshe bas tartyp, sony maqtan tutyp otyr. Eń az degende áielderdiń quqyǵyn buzǵany úshin aiyppul salynýy kerek. Al eń kóbi — bul ulttyq masqara», — dep jazdy ol.
