Foto: Aqorda
Memleket basshysy Qasym-Jomart Toqaev «Qazaqtelekom» AQ basqarma tóraǵasy Baǵdat Mýsindi qabyldady, dep habarlaidy Ult.kz.
Kezdesý barysynda Prezidentke kompaniianyń qyzmeti jáne sońǵy eki jylda júzege asyrylǵan negizgi infraqurylymdyq ári tehnologiialyq jobalardyń nátijeleri baiandaldy. Baǵdat Mýsinniń aitýynsha, búginde «Qazaqtelekom» 1,75 millionnan astam úi sharýashylyǵyna qyzmet kórsetedi.
Kompaniia el aýmaǵynda talshyqty-optikalyq jelini júieli túrde keńeitip, telekommýnikatsiia naryǵynyń negizgi segmentterinde kóshbasshylyq ornyn saqtap otyr. Sonymen qatar eldi mekenderdi bailanyspen qamtý jumystary jalǵasýda. 2027 jyldyń sońyna deiin halqy 1 millionnan asatyn 3 myńnan astam aýyldy sapaly bailanys qyzmetimen qamtamasyz etý josparlanǵan.
Kezdesýde «Kaspii TOBJ» halyqaralyq jobasynyń júzege asyrylýy jóninde de aityldy. Joba aiasynda Aqtaý – Sýmgait baǵyty boiynsha sýasty talshyqty-optikalyq bailanys jelisi tartylmaq. Bul bastama Qazaqstannyń tranzittik áleýetin kúsheitip, Eýropa men Aziia arasynda tsifrlyq dáliz qalyptastyrýǵa múmkindik beredi.
Sondai-aq derekterdi óńdeý infraqurylymyn damytý máselesine erekshe nazar aýdaryldy. Ekibastuz qalasynda «Derekterdi óńdeý ortalyǵy alqaby» strategiialyq jobasy aiasynda qýaty kezeń-kezeńimen arttyrylatyn zamanaýi ortalyq salynýda. Joba halyqaralyq tehnologiialyq kompaniialardy tartýǵa jáne eldiń investitsiialyq tartymdylyǵyn arttyrýǵa baǵyttalǵan.
Budan bólek, jasandy intellekt tehnologiialaryn engizýge basymdyq beriletini aityldy. Korporativtik úderisterdi avtomattandyrýǵa arnalǵan JI-agentterdi ázirleý, kiberqaýipsizdik sheshimderin jetildirý jáne memlekettik sektordy tsifrlandyrý boiynsha birqatar joba iske asyrylýda.
Prezident shaǵyn qalalar men aýyldardy sapaly bailanys jáne internetpen qamtýdyń mańyzyn atap ótip, tsifrlandyrý men jasandy intellekt salalaryndaǵy investitsiialyq jobalardy ýaqtyly júzege asyrýdy tapsyrdy.
