Birikken Arab Ámirlikteri Qazaqstanǵa koronavirýspen kúres úshin 13 myń tonnaǵa jýyq gýmanitarlyq júk jiberdi. Arnaiy júk tielgen ushaq búgin elorda áýejaiyna qonyp, ony QR Syrtqy ister ministrliginiń ókilderi qabyldap aldy, dep habarlaidy QazAqparat.
«Bizdiń suranysymyzben bul júktiń keletindigi osydan bir apta buryn belgili bolǵan edi. Jalpy, Ámirlikterge ǵana emes, barlyq memleketke elimizdiń Densaýlyq saqtaý ministrligi usynǵan tizimge sáikes qajetti meditsinalyq zattar boiynsha gýmanitarlyq kómek surap, hat joldaǵan edik. Arab elderiniń ishinen eń birinshi bolyp Birikken Arab Ámirlikteri gýmanitarlyq kómegin jiberip otyr. Gýmanitarlyq kómekte qolǵa kietin qolǵaptar, meditsinalyq maskalar, bahilalar, antiseptikter, birrettik ústige kietin arnaiy kiimder bar. Júktiń jalpy salmaǵy 13 tonnaǵa jýyqtaidy. Bul - Ámirlikter Úkimetiniń Qazaqstanǵa degen izgilik kómegi», - dedi BAQ ókilderine suhbat bergen QR Syrtqy ister ministrligi Taiaý, Orta Shyǵys jáne Afrika departamentiniń direktory Erjan Muqash.
Onyń aitýynsha, buǵan deiin Qazaqstanǵa Túrkiiadan, Qytaidan, Japoniiadan gýmanitarlyq kómek kelgen. Elimizden de gýmanitarlyq kómek surap otyrǵan memleket bar. Olarǵa kómek kórsetý máselesin aldaǵy ýaqytta el Úkimeti sheshetin bolady.
«Máselen, bizden Aýǵanstan men Iran elderi gýmanitarlyq kómek surap otyr. Jalpy, meditsinalyq zattarǵa emes, azyq-túlikke de muqtaj bolyp otyrǵan elder bar», - dedi ol.
Ámirlikterdiń bizge jetkizgen gýmanitarlyq júgin qabyldap alý sharasyna osy eldiń Qazaqstandaǵy Tótenshe jáne Ókiletti Elshisi Mohammad Ahmad Sultan Essa Aldjaber de arnaiy kelip qatysty.
«Ózderińiz de Ábý-Dabiden shamamen 13 tonna júk tielgen meditsinalyq qorǵanys zattary bar ushaqtyń kelgenine kýá boldyńyzdar. Bul eki eldiń jáne memleket basshylarynyń arasyndaǵy jyly qarym-qatynastyń, sonymen qatar koronavirýs indetimen birlese kúresý sharalarynyń arqasynda júrgizilip jatyr. Búginde álem osy indetten zardap shegip otyr. Bul qiyndyqtardy da eńseremiz. Al qazir, eń bastysy, Úkimet engizgen erejelerdi saqtap, úide otyrýymyz kerek», - dedi BAÁ Elshisi.
