«Adal kómek» jobasynyń jetekshisi, Ulttyq qoǵamdyq senim keńesiniń múshesi Aiman Omarova qazir halyqtyń quqyqtyq saýatyn arttyrý isi óte mańyzdy ekenin aitty, dep habarlaidy QazAqparat.
«Men óz jumysymda qazaq tildi ortaǵa kóp nazar aýdarǵym keledi. Álbette, men ol ortadan shettegim kelmeidi. Biraq aqparattyq alańda orys tilinde málimet, aqparat tym kóp bolsa, qazaq tilinde ondai múmkindik mol dep aita almaimyz. Aýyldaǵy azamattarmen til tabysý óte qiyn. Jalpy quqyqtyq saýatqa qatty áser etetin faktordyń biri – kompiýterlik saýat ekenine kózim jetti. Tsifrlandyrýmen birge halyqty kompiýter tilin meńgerýge úiretý kerek. Keide bul turǵyda jumysymdy qalai jalǵastyramyn dep oilaimyn. Kei azamattarmen sóilesip otyryp, olar menen «feisbýk degen ne?» dep suraǵan kezde ne dep jaýap bererimdi bilmei qalamyn. Amal joq, keshke otyryp, telefonmen bárin túsindirýge týra keledi», - deidi Aiman Omarova «Antikor LIVE» jobasynda.
Advokat qazir qoǵamda koronavirýs kóp máseleniń betin ashyp jatyr degen pikirge qatysty oiyn qosty.
«Bizdiń jaǵdaida koronavirýs quqyqtyq nigilizm problemasynyń betin ashyp berdi. Adamdardyń bári de problema joq kezde bári óz qalpynda tura berýi kerek oilaityn sekildi. Olai emes. Adamdar óz quqyǵyn bala kezden bilýi tiis. Azamattar óz quqyǵyn bala kezden bilse – quqyqbuzýshylyq az bolady, ekinshiden olar basyna is túsken kezde qaida barý kerektigin biledi. Aýyldaǵy azamattar qaida bararyn bilmeidi. Bilmegennen keiin problema týyndai beredi. Birneshe ai buryn maǵan túnniń bir ýaǵynda bir áiel qońyraý shalyp «álgi burynǵy kúieýim aliment tólemeidi, ólemin» deidi. Amal joq, ondaida psiholog bolyp ketemiz», - deidi Aiman Omarova.
