Bilim jáne ǵylym ministri Ashat Aimaǵambetov mektep bitirýshi túlekterdiń UBT-daǵy zańsyz áreketine qatysty pikir bildirdi, dep habarlaidy Sputnik Qazaqstan agenttigi.
Buǵan deiin ulttyq testileý ortalyǵy UBT-ǵa kirý barysynda 4 túlektiń (onyń ishinde 1 "Altyn belgi" iegeri bar) ornyna stýdentter kirýge tyrysqanyn habarlady. Olarǵa qatysty qylmystyq is qozǵalǵan.
Ministrdiń aitýynsha, bilim jáne ǵylym ministrligi júrgizgen reformanyń arqasynda qujatty qoldan jasaǵandar ulttyq biryńǵai testileýge kire almaǵan.
"Eń bastysy zań buzýshylyq bolǵan joq. Biz júrgizgen reformanyń arqasynda jalǵan qujatpen kiremin degen talapkerler UBT tapsyra almady. Dereý aty-jónin tiisti organdarǵa berdik. Eger testileýge kirerde tekseristiń bir ǵana satysy bolsa, qujatty kórsetip, ári qarai ótip ketetin edi. Qujatty kórsetkennen keiin, Face ID-ǵa barady. Úshinshi kezeńge barǵanda barlyǵy anyqtalady", - dedi ministr.
Ol sondai-aq biyl osyndai zańsyz áreketke barǵandar sany artqanyn aitty.
"Júrgizilgen ózgeristerdiń nátijesinde biyl testke ózi emes, basqa adamdy jibergen fakti birneshe ese kóbeiip otyr. Bul – durys sheshim. Zań buzýshylyq bolǵan joq, biz qabyldaǵan, engizgen sheshimniń arqasynda zań buzýshylyqqa jol berilmei otyr", - dedi ol.
Aita keteri, buǵan deiin belgili ázilkesh Tursynbek Qabatovtyń qyzy úshin UBT-ny basqa adam tapsyrdy degen aqparat tarady. Keiinnen Qabatov bul jaǵdaiǵa bailanysty túsinikteme berdi.
Qabatov óziniń, jary men mektep bitirgen qyzynyń bul iske qatysy joq ekenin, barlyǵyn oqýshylardy testke daiyndaityn ortalyq uiymdastyrǵanyn jetkizdi.
Ashat Aimaǵambetovtiń aitýynsha, mundai daiyndyq ortalyqtary eshkimnen litsenziia, ruqsat almaidy.
