Muǵalimderdiń eńbekaqysyn tóleýge qatysty máseleni óńirler der ýaqytynda sheshýi tiis. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Ókinishke qarai, osyndai operatsiialyq máselelermen ainalysýǵa týra kelip otyr. Árine, bul osy deńgeide kóteretin másele emes. Ministrlik eń bastysy strategiialyq máselelermen, bilim salasyndaǵy saiasatty iske asyrý máselelerimen ainalysýy kerek jáne bizdiń tikelei qyzmetimiz de sol. Naqty muny (muǵalimderge ýaqyty eńbekaqy men eńbek demalys aqysyn tóleý) júzege asyratyn - jergilikti atqarýshy organdar. Ol úshin bilim basqarmalary, bilim bólimderi, mektep basshylary bar. Osyndai deńgeide eńbekaqy máselesin taldaý, «eńbekaqy kei jerde tólenbedi» degen máseleniń ózin kóterý - árine, yńǵaisyz jait. Bul deńgeide kóteretin másele emes edi. Biraq, bizge óte kóp saýal túsip jatqannan keiin ony kóterip, naqty tapsyrma berip, tekserý júrgizýge májbúr boldyq», - dedi ministr vedmostvonyń apparat jinalysy barysynda.
Osyǵan orai ol tiisti sharalar qabyldanǵanyn basa aitty.
«Alaida kelesi joly bul máseleni mundai deńgeige kóteretindei órshitýge bolmaidy. Óz deńgeilerińizde sheshýlerińiz kerek. Tiisti sharalar qoldanylsyn. Komitet ary qarai da bul jumysty júrgizip, aiaǵyna deiin jetkizedi. Óitkeni, bul - áriptesterimizdiń Konstitýtsiialyq quqyǵy. Sondyqtan bul máseleni sońyna deiin jetkizetin bolamyz», - dedi Ashat Aimaǵambetov.
